Еліміздің бірқатар өңірінде су тасқыны салдарынан қалыптасқан күрделі жағдайға байланысты Мемлекет басшысы Қасым-Жомарт Тоқаевтың шешімі негізінде Қазақстан халқы Ассамблеясының кезекті ХХІІІ сессиясы онлайн-форматта өткізілді.
ҚХА-ның Төраға орынбасары — Ассамблея Хатшылығының меңгерушісі Марат Әзілханов модераторлық етуімен «Бірлік.Жасампаздық.Өрлеу» тақырыбында өткен сессия жұмысына еліміздің барлық өңірлеріндегідей сияқты Ассамблеяның Түркістан облысындағы мүшелері, Түркістан облысы әкімінің орынбасары Бейсенбай Тәжібаев, Түркістан облыстық мәслихатының төрағасы Нұралы Абишов, Түркістан облыстық Қоғамдық даму басқармасының «Қоғамдық келісім» КММ-нің басшысы Эльмира Жанғазиева және жастар қатысты.
Сессия барысында алдымен өз өңірлерінде Қазақстан халқы Ассамблеясы тарапынан атқарылып жатқан жұмыстары жайлы «Тәжік этномәдени орталығы» қоғамдық бірлестігінің төрағасы Ахмаджон Исмаилов, ҚХА-ның Төраға орынбасары -«Қазақстан корейлерінің Ассоциациясы» ұйымының төрағасы Юрий Шин, ҚХА-ның ‘Ассамблея жастары» қоғамдық бірлестігінің төрағасы Тимур Жұмырбаев, Қарағанды облыстық ҚХА-ның «Ассамблея жастары» қоғамдық бірлестігінің төрағасы Александр Урмашов және Жетісу облыстық ‘Достық үйі» мекемесінің директоры Руфина Усанова қатысушыларға баяндап берді.
Сонан соң Ел Президенті сөз алып, елдегі су тасқынына байланысты өңірлерде қалыптасқан жағдайлар жайлы айта келіп, осынау айтпай келген табиғи апатпен және оның зардаптарымен аянбай күресіп жатқан ел азаматтарының ерліктеріне тоқталып, Қазақстан халқы Ассамблеясы тарапынан да зардап шеккен өңірлердегі азаматтарға осы күнге дейін зор көмек көрсетілгендігін және көрсетіліп жатқандығын ерекше атап өтіп,жұрттың алғыс білдіріп жатқандығын жеткізді…
Оқи отырыңыз...
