Бүгін Достық үйінде 18 қазан – Рухани келісім күніне орай Шымкент қаласының Дін істері басқармасының ұйымдастыруымен «Бейбіт күн. Берекелі ел. Бақытты ұрпақ» тақырыбында кездесу өтті.
Іс-шараға Шымкент қаласының Дін істері басқармасының басшысы Серғазы Әбілхаиров, 50-ге жуық діни қызметкер мен қалалық этномәдени бірлестіктердің өкілдері қатысты.
Кездесудің мақсаты – конфессияаралық келісімді нығайту, дінаралық татулықты сақтау, қоғамдағы өзара құрмет пен түсіністікті арттыру, сондай-ақ бейбітшілік пен бірлікті дәріптеу.
«Рухани келісім – қоғамдағы бейбітшілік пен тұрақтылықтың, өзара құрмет пен сенімнің негізі. Қай қоғамда болмасын адамдардың діни сеніміне қарамастан, бір-бірін түсінуі, ортақ құндылықтарды құрметтеуі және татулықты сақтауы аса маңызды. Біздің басты мақсатымыз – қоғамда өзара түсіністік пен сыйластық мәдениетін қалыптастырып, дінаралық татулықты нығайту. Бұл ретте діни бірлестіктер мен этномәдени бірлестіктер өкілдерінің өзара ынтымақтастығының маңызы зор. Бірлік пен келісім бар жерде тұрақтылық болады, ал тұрақтылық бар жерде елдің дамуына жол ашылады. Әсіресе, өскелең ұрпақтың бойына бейбітшілік, ізгілік, толеранттылық пен жауапкершілік құндылықтарын сіңіруіміз қажет. Өйткені бүгінгі ұрпақтың санасына егілген татулық дәні – ертеңгі берекелі қоғамның кепілі. Баршаңызды Рухани келісім күнімен құттықтаймын! Елімізде әрдайым бейбітшілік орнап, халқымыздың бірлігі бекем, ынтымағы жарасымды болсын!», – деді басқарма басшысы Серғазы Кәрімұлы.
Кездесу барысында рухани құндылықтар, бейбітшілік пен келісімнің маңызы, қоғамдағы тұрақтылықты сақтау мәселелері талқыланды. Сонымен қатар діни бірлестіктердің жетекшілері қоғамдағы татулық пен бірлікті нығайтуға қосқан үлесі үшін алғыс хаттармен марапатталды.
Жиын барысында конфессияаралық диалогты дамыту мен діни бірлестіктер арасындағы өзара ынтымақтастықты нығайту мәселелеріне де назар аударылды. Қоғамдағы түрлі діни сенім өкілдерінің ортақ мақсат жолында бірлесе әрекет етуі өзара түсіністік пен сенімді арттыруға мүмкіндік береді. Мұндай байланыстар қоғамдық тұрақтылықты сақтауға және азаматтардың бір-біріне деген құрметін нығайтуға ықпал етеді.
Рухани келісім ұғымы адамдардың сеніміне құрметпен қараумен ғана шектелмейді. Ол ізгілік, мейірімділік, адамгершілік, жауапкершілік және бейбіт өмір сүру сияқты ортақ құндылықтарды қамтиды. Осы қасиеттерді күнделікті өмірде ұстану қоғам мүшелерінің арасындағы байланысты нығайтып, түрлі көзқарастағы адамдардың өзара түсіністікпен өмір сүруіне негіз болады.
Іс-шарада өскелең ұрпақтың рухани тәрбиесіне де ерекше мән берілді. Жастардың бойында төзімділік, сыйластық пен азаматтық жауапкершілікті қалыптастыру – келешек ұрпақтың бейбіт әрі қауіпсіз ортада өмір сүруі үшін маңызды. Бұл бағытта білім беру ұйымдары, діни бірлестіктер және қоғамдық институттар арасындағы өзара іс-қимылдың орны ерекше.
Осындай кездесулер рухани келісімнің маңызын кеңінен түсіндіруге, дінаралық татулықты нығайтуға және ортақ құндылықтар төңірегінде қоғамды біріктіруге бағытталған. Бейбітшілік пен бірлікті сақтау – әр азаматтың ортақ міндеті.
