Түркістан жоғары көпсалалы, аграрлық колледжінде жастар арасында түсіндіру жұмыстарын жүргізу мақсатында кездесу өтті.
Кездесуге Шымкент қаласы «Қоғамдық келісім» КММ-нің қызметкерлері Батырбек Жалмұрзаев пен Талғат Бейсембиев, Шымкент қаласы “Қоғамдық келісім” КММ жанындағы Медиация кеңесінің кәсіби медиаторы Имбарова Гулназ, Шымкент қаласы Жастар саясаты басқармасының «Жастар ресурстық орталығы» КММ маманы Нұржақсын Қармантай және Шымкент қаласы Дін істері басқармасының «Дін мәселелерін зерттеу орталығы» КММ бөлім басшысы Рауан Қыпшақбаев қатысты.
Кездесу барысында жастарға қатысты өзекті мәселелер талқыланып, діни сауаттылықты арттыру, дәстүрлі құндылықтарды дәріптеу және жастардың қоғамдағы жауапкершілігін нығайту бағытында түсіндіру жұмыстары жүргізілді.
Іс-шараның негізгі мақсаты – жастардың бойында дұрыс дүниетаным қалыптастыру, олардың сыни ойлау қабілетін дамыту және қоғамдағы тұрақтылық пен келісімді нығайту.
Жиын барысында жастардың ақпаратты дұрыс қабылдап, әртүрлі дереккөзден алынған мәліметтерді саралай білуіне ерекше назар аударылды. Қазіргі ақпараттық кеңістікте жалған ақпарат пен күмәнді мазмұндағы материалдар кездесетіндіктен, кез келген мәліметке сыни көзқараспен қарау маңызды. Мамандар жастарды ақпараттың шынайылығын тексеруге, сенімді дереккөздерге жүгінуге және саналы шешім қабылдауға шақырды.
Діни сауаттылық мәселесі аясында дәстүрлі құндылықтарды құрметтеу, дінге қатысты ақпаратты дұрыс түсіну және деструктивті діни ағымдардың ықпалына түсу қаупінің алдын алу жолдары түсіндірілді. Жастардың бойында адамгершілік, мейірімділік, өзара құрмет пен жауапкершілік қасиеттерін қалыптастырудың маңызы атап өтілді. Бұл құндылықтар жас буынның жеке тұлға ретінде қалыптасуына және қоғаммен үйлесімді қарым-қатынас орнатуына ықпал етеді.
Кездесуде медиацияның қоғамдағы орны да сөз болды. Келіспеушіліктерді өзара диалог арқылы шешу, тараптардың пікірін тыңдау және ортақ мәмілеге келу дағдыларының маңызы түсіндірілді. Кәсіби медиатордың қатысуымен жүргізілетін келіссөздер жанжалды ушықтырмай, өзара тиімді шешім табуға мүмкіндік береді. Мұндай тәсіл жастар арасында сабырлылық пен келісім мәдениетін дамытуға көмектеседі.
Сонымен қатар қоғамдық келісім мен этносаралық татулықты сақтау әр азаматтың ортақ жауапкершілігі екені айтылды. Өзге адамдардың көзқарасына құрметпен қарау, мәдени әралуандықты бағалау және қоғамдағы бейбітшілікке үлес қосу – бірлігі бекем елдің маңызды қағидаттары.
Осындай рухани-ағартушылық кездесулер жастардың таным көкжиегін кеңейтіп, өзекті мәселелер жөніндегі білімін арттыруға бағытталған. Жас ұрпақтың саналы, жауапты әрі қоғам өміріне белсенді араласатын азамат болып қалыптасуына жағдай жасау қоғамдық тұрақтылық пен бірлікті нығайтудың маңызды бөлігі саналады.
