ЖАСТАРҒА ЭТНОСАРАЛЫҚ ТАТУЛЫҚ ПЕН ҚҰҚЫҚТЫҚ МӘДЕНИЕТТІҢ МАҢЫЗЫ ТҮСІНДІРІЛДІ
Шымкент қаласында орналасқан Аймақтық-инновациялық университетінде студент жастардың қатысуымен арнайы ақпараттық-түсіндіру кездесуі өтті. Бұл маңызды іс-шараның негізгі мақсаты – этносаралық татулық пен келісімді нығайту, жалпыұлттық бірлік құндылықтарын кеңінен дәріптеу, жастар арасында отансүйгіштік сезімді ұштау және қазақстандық патриотизмді қалыптастыру болып табылады.
Бүгінгі жаһандану дәуірінде өскелең ұрпақтың бойына азаматтық жауапкершілік пен саяси-құқықтық мәдениетті сіңіру – мемлекеттік саясаттың негізгі басымдықтарының бірі. Жоғары оқу орындарының студенттерімен еркін форматында жүдесіп, олардың бойында сыни ойлау қабілетін дамыту, деструктивті идеологиялардан сақтандыру және ел ішіндегі бейбітшілікті сақтаудағы ортақ жауапкершілікті түсіндіру өз жемісін берері сөзсіз.
Кездесу барысында мемлекеттік саясаттың басым бағыттары, қоғамдағы тұрақтылық пен келісімді сақтаудың маңыздылығы, сондай-ақ кереғар діни ағымдар мен радикалды идеологиялардың ықпалынан сақтану жолдары кеңінен түсіндірілді. Сонымен қатар жастардың құқықтық сауаттылығы мен мәдениетін арттыру, ғаламтор мен әлеуметтік желілерде ақпарат тарату кезінде жоғары жауапкершілік таныту, жалған ақпараттарға сыни көзқараспен қарау және арандатушылық сипаттағы жарияланымдарға жол бермеу қажеттігі егжей-тегжейлі айтылды.
Сондай-ақ шарада әлеуметтік, ұлттық, рулық, нәсілдік, тектік-топтық және діни алауыздықты қоздырудың құқықтық салдарына арнайы тоқталып, мұндай заңсыз әрекеттер үшін Қазақстан Республикасының заңнамасында қатаң қылмыстық жауапкершілік көзделгені ашық ескертілді.
Бұдан бөлек, студенттік шақ – бұл тек білім алу кезеңі ғана емес, сонымен бірге тұлғалық қалыптасу мен азаматтық ұстанымды айқындаудың маңызды сатысы. Сонымен қатар, университеттің белсенді студенттері өз қатарластары арасында құқықтық түсіндіру жұмыстарын жүргізіп, «Адал азамат» тұжырымдамасына сай отансүйгіштік, адалдық пен еңбекқорлық идеяларын ілгерілетуге дайын екендіктерін жеткізді. Мұндай бастамалар жастардың қоғамдық-саяси өмірге белсене араласуына серпін береді.
Жиынға Шымкент қаласы ішкі саясат және жастар істері жөніндегі басқармасының «Қоғамдық келісім» мекемесінің сарапшысы М. Бесбаева және Дін істері басқармасы жанындағы Дін мәселелерін зерттеу орталығы КММ-нің теолог маманы Р. Қыпшақбаев арнайы қатысты.
Мамандар жастардың көкейінде жүрген сауалдарына тұжырымды жауаптар беріп, қоғамдағы бейбітшілік пен тұрақтылықты сақтау, өзара құрмет пен азаматтық жауапкершілік қағидаттарын берік ұстану әрбір жастың ортақ міндеті екенін баса айтты.




