Түркістан облысы Кәсіпкерлер палатасында Білім беруді және медицинаны дамыту салалық кәсіпкерлер кеңесінің отырысы өтті. Кездесуде жекеменшік мектептердің А2 компоненті бойынша қаржыландыруына қатысты өзекті мәселелер талқыланды.
Негізгі мәселе – 2025 жылдың соңғы төрт айына төленбей қалған А2 компоненті бойынша қаражат, сондай-ақ алдағы кезеңдерге тиесілі қаржыландыруды жүзеге асыру мәселесі. Жекеменшік мектептердің өкілдері қаржыландыру тетіктері, құжаттарды зерделеу барысы және жүргізіліп жатқан жұмыстарға қатысты сұрақтарын қойды.
Кәсіпкерлер палатасы директорының экономикалық мәселелер жөніндегі орынбасары Бақытжан Құралбаев жекеменшік мектептердің тұрақты жұмыс істеуі үшін қаржыландырудың уақтылы әрі ашық жүзеге асырылуы маңызды екенін атап өтті.
«Бұл мәселе жекеменшік мектептердің қаржылық тұрақтылығына ғана емес, білім беру процесінің үздіксіздігіне де тікелей әсер етеді. Сондықтан кәсіпкерлер көтеріп отырған мәселелерді нақтылап, оларды шешу жолдарын жауапты мемлекеттік органдармен бірлесіп пысықтау қажет», – деді Бақытжан Құралбаев.
Өз кезегінде салалық кәсіпкерлер кеңесінің төрайымы Шолпан Бегалиева жекеменшік білім беру ұйымдарының ұсыныстары мен мәселелерін жүйелі түрде қарау қажеттігін айтты.
Отырыс барысында жауапты тараптар кәсіпкерлердің сауалдарына түсініктеме беріп, А2 компоненті бойынша қаржыландыруға қатысты мәселелерді одан әрі пысықтауға уағдаласты.
