Түркістан облысының бас имамы Ержан Сматұлы Толепов Жетісай ауданына жасаған іс-сапары барысында аудандық орталық «Нұғман» мешітінің жанынан жаңадан ашылған студия бөлімінің тыныс-тіршілігімен танысты. Аудан бас имамы Айдарбек Садыков жаңадан іске қосылған студияда қолға алынып жатқан бірнеше жобалармен таныстырып өтті. Сөз барысында А.Садыков: «Құрметті бас имам! ҚМДБ бастамасымен және өзіңіздің қолдауыңызбен Рамазан айында 30 күндік уағыз-насихат жоспары құрылып, тікелей эфир арқылы күнделікті арнайы тақырыптар бойынша уағыз айту қолға алынды. Сонымен қатар, мешіт жанынан жаңадан студия бөлімі ашылуда. Алдағы уақытта арнайы жобалар жасақталып, әлеуметтік желілерде арналарға қосылу жоспарлануда»,- деп атап өтті. Өз кезегінде облыс бас имамы Ержан Сматұлы игі бастамаға әрдайым қолдау білдіретіндігін, жұмыс жоспарының ішіне белгілі қоғам қайраткерлері мен дін саласында еңбек етіп жүрген ақпараттық-насихат топ мүшелерімен сұхбаттар өткізуді ұсынды. Сонымен бірге, студия жұмысын жандандырып әрі сапалы, қоғамға пайдалы насихаттар шығуын тілеп, дұға жасады.
