Қоршаған ортаны қорғау, экологияны жақсарту — адамзаттың өзі үшін жасаған жақсылығы. Өйткені, біздің тыныстап отырған ауамыз, ішкен суымыз, тұтынған азық-түлігіміз, бәрі-бәрі біздің қоршаған ортамен байланысты. Сондықтан табиғат анаға қамқорлықпен қарап, залалымызды келтірмегеніміз өзімізге тиімді.
Жасыратыны жоқ, әлем бойынша экологиялық дағдарыс үстіндеміз. Ірі зауыт-фабрикалар, кәсіпорындар, жылыту ошақтары және көлік құралдары жыл сайын қаншама улы, уытты заттарды бөліп шығаруда. Қоқыс қалдықтарының да жыл санап артып, олардың басым көпшілігі өзен-көлдерімізді, теңіз, мұхиттарымызды ластап жатыр. Сондықтан, бұл өте алаңдатарлық мәселе. Бүгінде елімізде де экологиялық мәселе қатты алаңдатып отыр. Қалаларымызда ауа сапасы өте нашар. Ластанған ауаның салдарынан түрлі аурулар пайда болып отыр. Ал бұл мәселені бүгіннен шешпесек, залалы орасан зор болмақ.
Күні кеше ғана Мемлекет басшысы үкіметтің кеңейтілген отырыснда осы экология мәселесіне қатысты нақты тапсырмалар айтты. Президент баяндама:»Қоғамдық бақылау құралы ретінде интерактивті карта дайындау қажет. Сол арқылы экология саласында атқарылып жатқан жұмыстардың барысы мен тиімділігін қадағалауға болады. Үкіметке 2021-2025 жылдарға арналған «Жасыл Қазақстан» Ұлттық жобасын әзірлеуді тапсырамын. Әсіресе, қоршаған ортаны қорғау ісіне қажетті барлық көрсеткіштерді цифрландыру – маңызды міндеттердің бірі», – деді. Демек, экология мәселесі Үкімет пен қоғамның ұдайы бақылауында болады деген сөз.
Естеріңізде болса, президент өткен жылдан бастап, экологияға қатысты үлкен істерді бастап кетті. Әсіресе, экологиялық мәдениетті қалыптастыру бойынша маңызды тапсырмаларды ұсынған еді. Нәтижесінде, табиғатқа зиян келтіріп, қоршаған ортаны ластағандарға айыппұл көлемін арттыруды және еліміздегі мектептерде экология пәнін енгізу тапсырылып, жұмыс басталып кетті. Бұл біздің қоғам үшін өте өзекті мәселе. Демек, экологиялық мәдениет қалыптыстыру-уақыт талабы. Оны ертең, я арғы күні бастау кеш, бүгіннен бастау қажет.
Досжан Балабекұлы
