Қандай заман, қай қоғам болмасын білім алуды ешқашан шетке ысырып қойған емес. Қазіргі қоғам білімді жастардың қоғамы. Жас буынға білім беру жолында еңбек етіп жүргендіктен білім саласында болып жатқан барлық өзгерістер мен жаңалықтар менің жаныма жақын. Ел дамуындағы барлық маңызды деген мәселелерді атап айтып, шешу жолдарын ұсына келе, ел Президенті биылғы жылға арнаған өз Жолдауындағы бесінші мәселе ретінде білім беру саласына тоқталып өтіп еді.
Әлем елдеріндегі пандемиялық жағдайларды ескере, еліміздегі карантиндік жағдайды қатаң сақтай отырып, білім беру саласының қашықтықтан ұйымдастырылып отырғанын, сондай-ақ қашықтықтан білім беру жүйесінің әдеттегі дәстүрлі сабаққа жетпейтініне тоқталды. Әрбір оқушы мен ұстаздың денсаулығы мен өмірін сақтау жолын ескере отырып, дәстүрлі жүйеде білім беруге дайындық жұмыстарын жүргізуді де атап айтты. Қашықтықтан білім беру жүйесінде де барынша дамытылған онлайн білім беру платформаның дайындалу керек екенін тілге тиек етті.
Дәстүрлі жүйе бойынша білім алуға барша жағдай жасауды тапсырғаны алдағы оқу жылында жүзеге асырыла бастамақ. Оған Шымкент қаласының Білім басқармасы тыңғылықты әзірліктер жасауда. Оқушылардың екі ауысыммен жаңа да жайлы заманауи мектептерде білім алуы үшін биылдың өзінде ондаған мектептер мен мектеп жанындағы қосымша нысандар салынып пайдалануға берілуде.
Басты назарды жасөспірімдердің спорт пен шығармашылық тұрғыда білім алуына жағдай жасауға жұмсауды тапсырды. Әрбір жас бүлдіршінге мектепке дейінгі оқу-тәрбие берілуі керектігін, балабақшалар мен мектепке дейінгі білім беру орындарын көбейту үшін жұмыс жасауды, білімді ұрпақтың ел болашағы екенін еске салды.
Сонымен қатар Президентіміз жылдағы Жолдауында атап айтатын тағы бір мәселе – ұстаздардың еңбекақысы жайлы болды. Биылғы қаңтар айында ел ұстаздарының еңбекақысы 25 пайызға өсті. Өзім де ұстаз ретінде мемлекет тарапынан жасалып отырған әрбір көмек бізді жігерлендіре түседі дегім келеді. Мен еліміздің дамуы мен жаңаруы жолында бар күш жігерімізді сала отырып, еңбек ету біздің басты парызымыз санаймын.
Ел президенті өз Жолдауының түйіні ретінде ұлт ұстазы Ахмет Байтұрсынұлының «Білімді болуға оқу керек. Бай болуға кәсіп керек. Күшті болуға бірлік керек. Осы керектердің жолында жұмыс істеу керек»,- деген даналық сөзімен бекітті.
Қазіргідей жаңарған жаңа заманда еліміздің әрбір азаматы жоғары білім мен табанды еңбектің нәтижесінде ғана биік белестерден көрінетінін ашық жеткізді. Ел азаматтарын, отанымыздың алдында адал қызмет етуге, абыройлы іс жасауға, терең білім алып, ерінбей еңбек етуге шақырды.
Зира МАМЫТОВА,
Шымкент қаласы,
№60 жалпы білім беретін орта мектебінің
физика пәнінің мұғалімі.
