Түркістан облысында кәсіпкерлердің құқықтық мәселелерін шешуге адвокаттардың кәсіби тәжірибесін кеңінен тартуға мүмкіндік беретін жаңа ынтымақтастық форматы қолға алынды. Осы мақсатта Түркістан облысының кәсіпкерлер палатасы мен адвокаттар алқасы бизнестің құқықтық мәселелерін бірлесіп зерделеп, жүйелі проблемаларды анықтау және оларды шешуге бағытталған нақты ұсыныстар әзірлеуге уағдаласты.
Бұл бағыттағы жұмыстарды жүйелеу мақсатында Түркістан облысының Кәсіпкерлер палатасы мен Түркістан облысының адвокаттар алқасы арасында өзара ынтымақтастық туралы меморандумға қол қойылды. Құжатқа Кәсіпкерлер палатасының директоры Асылан Ибадуллаев пен облыстық адвокаттар алқасының төрағасы Қайрат Қамбаров қол қойды.
Ынтымақтастықтың басты ерекшелігі – кәсіпкерлердің құқықтарын қорғау мәселесіне тек жекелеген шағымдар немесе сот процестері аясында емес, жүйелі құқықтық проблема ретінде қарау. Яғни адвокаттардың нақты істер барысында анықтаған мәселелері жинақталып, олардың себептері мен құқықтық негіздері сараланады. Егер белгілі бір мәселе бірнеше кәсіпкердің қызметіне әсер ететін жүйелі сипатқа ие болса, оны шешу жолдары Палатамен бірлесіп әзірленеді.
Меморандумға сәйкес, адвокаттар кәсіпкерлердің істерін жүргізу барысында туындаған проблемалық мәселелер бойынша Палатаға тиісті құқықтық ұстанымдар мен оларды шешудің ықтимал жолдарын ұсынады. Палата өз кезегінде бұл мәселелерді саралап, құзыреті шегінде мемлекеттік және құқық қорғау органдарымен өзара іс-қимыл барысында көтеруге, сондай-ақ өңірлік және республикалық деңгейдегі сараптамалық алаңдарға шығаруға мүмкіндік алады.
«Кәсіпкердің құқығы бұзылғаннан кейін ғана әрекет ету жеткіліксіз. Ең маңыздысы – кәсіпкерлер жиі кездесетін мәселелерді дер кезінде анықтап, олардың түпкі себептерін зерттеу және қайталануына жол бермейтін шешімдер ұсыну. Адвокаттар нақты істердің құқықтық қырын жақсы біледі, ал Палатаның бизнестің проблемаларын жинақтап, оларды жүйелі түрде көтеруге мүмкіндігі бар. Осы екі бағыттың тоғысуы кәсіпкердің мәселесін шешумен қатар, бизнес жүргізуге кедергі келтіретін құқықтық және әкімшілік түйткілдерді азайтуға ықпал етеді», – деді Түркістан облысы Кәсіпкерлер палатасының директоры Асылан Ибадуллаев.
Өзара іс-қимыл аясында мемлекеттік органдардың кәсіпкерлердің заңды қызметіне кедергі келтіретін шешімдері мен әрекеттері де назарға алынбақ. Мұндай фактілер жинақталып, құқықтық тұрғыдан талданады. Негіз болған жағдайда оларды тиісті мемлекеттік және құқық қорғау органдарының қарауына шығару көзделген.
Сонымен қатар тараптар бірлескен талдамалық және ғылыми-практикалық жұмыстар жүргізіп, консультациялық және білім беру іс-шараларын өткізеді. Кәсіпкерлердің құқықтарын қорғау тәжірибесіне қатысты статистикалық, құқықтық және талдамалық ақпаратпен алмасу да жолға қойылады.
Адвокаттар алқасының төрағасы Қайрат Қамбаров меморандумның құқықтық мәселелерді тек жеке істер шеңберінде қарастырмай, оларды жүйелі түрде шешуге мүмкіндік беретінін атап өтті.
«Адвокаттың жұмысы нақты бір істі жүргізумен шектелмейді. Іс барысында кәсіпкерлердің қызметіне әсер ететін ортақ проблемалар жиі анықталады. Мұндай мәселелердің құқықтық себептерін талдап, тиісті ұсыныстар әзірлеу маңызды. Палатамен бірлескен жұмыс осы мәселелерді кеңірек деңгейде қарауға мүмкіндік береді. Біздің ортақ мақсатымыз – кәсіпкердің заңды құқығы мен мүддесін қорғауға ықпал ететін тиімді құқықтық тетіктерді қалыптастыру», – деді Қайрат Қамбаров.
Меморандум аясындағы өзара іс-қимыл қылмыстық, әкімшілік, азаматтық және әкімшілік сот ісін жүргізу салаларында кәсіпкерлік субъектілерінің құқықтарын қорғауға қатысты мәселелерді қамтиды. Бұл ретте тараптар кәсіби тәуелсіздік, тең құқықтылық және құпиялылық қағидаттарын сақтай отырып жұмыс жүргізеді.
Жаңа әріптестік форматы кәсіпкерлердің құқықтарын қорғау бойынша жинақталған тәжірибені біріктіріп, жеке мәселелерден жүйелі шешімдерге көшуге мүмкіндік береді. Нәтижесінде бизнестің заңды қызметіне кедергі келтіретін түйткілдерді анықтау, оларды құқықтық тұрғыдан негіздеу және тиісті деңгейде шешу жұмыстарының тиімділігін арттыру көзделіп отыр.
