Түркістан облысында білім беру саласын жаңғырту аясында маңызды шаралар жүзеге асырылуда. Мемлекет басшысының 2024 жылғы 2 қыркүйекте берген Қазақстан халқына Жолдауында республика көлемінде 1 300 мектепті күрделі жөндеуден өткізу міндеті қойылған болатын. Осы мақсатта Түркістан облысында 115 мектеп реновациялау жобасына енгізіліп, өңірде білім беру инфрақұрылымын жақсарту жұмыстары жүйелі түрде басталды.
Жөндеу жұмыстары кезең-кезеңімен 2025 жылдан 2027 жылға дейін жүргізіледі. Биыл 41 мектептің күрделі жөндеуден өтуі жоспарланып, сол жұмыстарға алғашқы қадамдар жасалды. Келесі жылы 38 мектеп, ал 2027 жылы тағы 36 білім беру мекемесі жаңғыртылады. Бұл көрсеткіштер облыстың білім беру жүйесін дамытуға берілген зор қолдау мен назардың айқын көрінісі болып табылады.
Қазіргі таңда Отырар, Төлеби, Шардара, Сауран, Қазығұрт, Бәйдібек, Ордабасы аудандары мен Түркістан қаласындағы мектептерде күрделі жөндеу жұмыстарын бастауға дайындық кезеңі жүріп жатыр. Оқу процесінің аяқталуымен қатар, мектептерде сынып бөлмелері босатылып, оқулықтар мен құрал-жабдықтар арнайы қоймаларға жеткізілуде. Бұл — жөндеу жұмыстарын сапалы және тиімді жүргізудің алғашқы қадамы.
Жөндеу жұмыстары білім беру басқармасы ұсынған заманауи стандарттарға сәйкес жүргізіледі. Мектептердің интерьері мен сыртқы көрінісі заманауи дизайн талаптарына сай жаңартылып, оқушылар мен мұғалімдер үшін қолайлы әрі қауіпсіз оқу ортасы жасалады. Бұл жұмыстар әсіресе ауылдық жерлердегі мектептерге баса назар аударып, онда 30-40 жылдан астам уақыт бұрын салынған білім ошақтарының жағдайын түбегейлі жақсартуға бағытталған. Мұндай бастама ауыл мен қала мектептері арасындағы материалдық-техникалық айырмашылықты азайтып, білім алуда тең мүмкіндіктер қалыптастыруға мүмкіндік береді.
Облыс әкімінің орынбасары Бейсен Дәулетұлы жөндеу жұмыстарын қатаң бақылауда ұстап, жауаптыларға нақты тапсырмалар бергенін ерекше атап өту керек. Оның айтуынша, ең басты талап – оқу процесіне кедергі келтірмей, жөндеу жұмыстарының сапалы әрі уақытылы аяқталуы. Бұл мақсатта әрбір білім беру мекемесінің басшылары мен мердігерлерге нақты міндеттер қойылған. Сонымен қатар, материалдар мен құрылыс техникасының сапасына ерекше мән берілуде.
Жөндеу жұмыстарының нәтижесінде мектептерде оқушылардың білім алуына барлық жағдай жасалып, жаңа заманауи білім беру ортасы құрылады. Мұғалімдер үшін де жұмыс жағдайлары жақсарып, олардың педагогикалық мүмкіндіктерін толық ашуға мүмкіндік туындайды. Жаңартылған мектептерде оқу сапасы артатыны, білім алушылардың оқу процесіне деген ынтасы күшейетіні күтілуде.
Осылайша, Түркістан облысында білім беру саласындағы инфрақұрылымды жаңғырту – елдің білім беру жүйесін жақсартудың маңызды бөлігі әрі балалар мен жастарға сапалы білім беру үшін жасалып жатқан ауқымды шаралардың бірі болып отыр. Бұл бастама облыстың әлеуметтік-экономикалық дамуына, жас буынның болашағына оң ықпал ететіні сөзсіз.
