Қалалық Достық үйінде ұйғыр этносының тілі, мәдениеті мен салт-дәстүрлерін дәріптеуге арналған мерекелік іс-шара өтті.
Мәдени шараға Шымкент қаласының «Қоғамдық келісім» КММ басшысы Заңғар Үсіпахметов, қалалық этномәдени бірлестіктердің басшылары мен өкілдері, жастар және қала тұрғындары қатысты.
Іс-шара барысында ұйғыр халқының ұлттық мәдениеті мен өнері кеңінен насихатталып, әндер шырқалып, түрлі этностардың өнерпаздары өз өнерлерін ортаға салды. Сонымен қатар Алматы қаласынан арнайы келген өнерпаздар да мерекелік бағдарламаның көркін қыздырды.
Мәдени шарада сөз сөйлеген Шымкент қаласының «Қоғамдық келісім» КММ басшысы Заңғар Үсіпахметов ұйғыр халқының тілі, мәдениеті мен салт-дәстүрінің маңызына тоқталды.
«Шымкент – түрлі этнос өкілдері өз мәдениеті мен дәстүрін еркін дәріптеп, өзара сыйластық пен түсіністікті нығайтып келе жатқан татулықтың ордасы. Осындай мәдени іс-шаралар қоғамдық келісімді одан әрі нығайтып, бірлігімізді бекемдей түседі. Баршаңызды бүгінгі мерекелік шарамен құттықтай отырып, ұйғыр этносының мәдениеті мен ұлттық құндылықтарын насихаттау бағытындағы жұмыстарға табыс тілеймін. Тілі мен дәстүрін құрметтеген халықтың рухани мұрасы әрдайым жасай бермек», – деді Заңғар Үсіпахметов.
Мерекелік бағдарлама барысында ұлттық өнердің түрлі бағыттары таныстырылып, көрермендерге ұйғыр халқының мәдени ерекшеліктері көрсетілді. Өнерпаздардың орындауындағы әндер мен шығармашылық қойылымдар көпшілікке көтеріңкі көңіл күй сыйлап, ұлттық мәдениеттің өзіндік ерекшелігін таныта түсті. Әсіресе жастардың іс-шараға белсенді қатысуы ұлттық құндылықтарды насихаттау жұмыстарының сабақтастығын көрсетті.
Ұлттық мәдениетті сақтау ең алдымен тілді, дәстүрді, өнерді және тарихи-рухани мұраны құрметтеуден басталады. Осы тұрғыдан алғанда этномәдени бірлестіктердің жұмысы ерекше маңызға ие. Олар түрлі мәдени шаралар ұйымдастырып, өскелең ұрпаққа ата-баба мұрасын таныстыруға, ұлттық құндылықтарды дәріптеуге және мәдени сабақтастықты қалыптастыруға үлес қосып келеді.
Шымкент қаласында әр этнос өкілінің өз мәдениеті мен дәстүрін дамытуына мүмкіндік беретін орта қалыптасқан. Достық үйі осы бағыттағы жұмыстардың маңызды алаңдарының бірі ретінде түрлі этномәдени бірлестіктердің басын қосып, ортақ құндылықтарды дәріптеуге жол ашады. Мұнда ұйымдастырылатын кездесулер мен мәдени бағдарламалар халықтар арасындағы достықты нығайтып, өзара түсіністікті арттыруға ықпал етеді.
Сонымен бірге мұндай іс-шаралар жастарға мәдени әралуандылықтың маңызын түсіндіруге мүмкіндік береді. Бір-бірінің салт-дәстүрі мен өнерін таныған жас ұрпақ қоғамдағы өзара құрмет пен толеранттылықтың құндылығын тереңірек түсінеді. Бұл қоғамдық келісімнің берік негізін қалыптастыруға және қала тұрғындарының бірлігін нығайтуға әсер етеді.
Айта кетейік, мұндай мәдени-рухани іс-шаралар этнос өкілдерінің ұлттық құндылықтарын дәріптеп қана қоймай, түрлі мәдениеттер арасындағы өзара құрмет пен түсіністікті арттыруға, қоғамдық келісім мен бірлікті нығайтуға ықпал етеді.
