Қазақстан Республикасының Премьер-министрінің орынбасары Қанат Бозымбаев жұмыс сапарымен Жамбыл облысына барып, Тараз қаласында оңтүстік өңірлердің әлеуметтік-экономикалық дамуы мен «Ауыл аманаты» жобасын жүзеге асыру мәселелері бойынша кеңес өткізді. Кеңеске Жамбыл облысының әкімі Ербол Қарашөкеев, Түркістан облысының әкімі Нұралхан Көшеров, Қызылорда облысының әкімі Нұрлыбек Нәлібаев, Шымкент қаласының әкімі Ғабит Сыздықбеков және Үкіметтің басқа да жоғары лауазымды тұлғалары — Ұлттық экономика вице-министрі Бауыржан Омарбеков пен Қаржы вице-министрі Абзал Бейсенбекұлы қатысты.
Кеңес отырысының негізгі мақсаты — Оңтүстік өңірлердің дамуы мен әлеуметтік-экономикалық жағдайын талқылау, облыстар мен Шымкент қаласында ауыл шаруашылығы, өндіріс, инфрақұрылымдық даму және инвестициялық жобаларды іске асыру мәселелеріне көңіл бөлу болды. Сонымен қатар, отырыста жаңа Бюджет кодексі аясында бюджеттік жоспарлау ережелері мен өңірлік стандарттар жүйесі түсіндірілді.
2024 жылдың қорытындысы бойынша өңірлік стандарттар жүйесінің көрсеткіштеріне назар аударылды. Бұл жүйе арқылы өңірлердегі нысандар мен қызметтермен қамтамасыз ету деңгейі бағаланады. Қазіргі кезде Жамбыл облысында бұл көрсеткіш 74,1% деңгейінде, республика бойынша 4-орынға ие болса, Түркістан облысы 66,3% көрсеткішпен 14-орында, Қызылорда облысы 66,8% деңгейде 6-орынға жайғасқан. Ал Шымкент қаласы 87,9%-бен республикалық көшбасшылар қатарында, 2-орынды иеленді. Жалпы, барлық оңтүстік өңірлер республика бойынша орташа деңгейден (66,1%) жоғары көрсеткішке қол жеткізді.
Экономикалық өсу мен тұрақтылықтың негізгі қозғаушы күші ретінде ауыл шаруашылығы, шағын және орта бизнес қарастырылды. Оңтүстік өңірлер еліміздің азық-түлік қауіпсіздігін қамтамасыз етуде маңызды рөл атқарады, сондықтан ауыл шаруашылығы өнімдері мен өңдеуді дамыту, ауылдық жерлерде жұмыс орындарын құру — басты басымдықтардың бірі болып отыр.
Соған қарамастан, өңірлердегі инфрақұрылымдық жағдай әлі де өзекті мәселе ретінде қала береді. Қанат Бозымбаев кеңес барысында инфрақұрылымдық жобаларды жоспарлауда өңірлік стандарттар жүйесінің талаптарын қатаң ұстануды ескертті. Бұл өңірлік теңгерімді сақтау және аймақтар арасындағы даму айырмашылықтарын азайтуға бағытталған маңызды қадам.
Сонымен қатар, вице-премьер әкімдерге Ұлттық экономика министрлігінің бюджеттік инвестициялық жобаларды басымдықпен іріктеу жөніндегі әдістемелік ұсынымдарын ескере отырып, артта қалған ауылдық елді мекендерді бірінші кезекте қаржыландыруды тапсырды. Бұл шара өңірлік даму теңсіздігін азайтып, ауылдық жерлерде өмір сүру деңгейін жақсартуға бағытталған.
«Ауыл аманаты» жобасы аясында Жамбыл облысында шамамен 10 мың жұмыс орнын құруды көздейтін инвестициялық жобалар дайындалған. Қызылорда облысында 8 мың жұмыс орны ашылса, Түркістан облысында 23 мыңнан астам жаңа жұмыс орнын құру жоспарланып отыр. Бұл жобалардың іске асырылуын жеделдету міндеті қойылды. Осы орайда Қанат Бозымбаев Ұлттық экономика министрлігіне, Қаржы министрлігіне, Еңбек және халықты әлеуметтік қорғау министрлігіне және облыс әкімдіктеріне бірлесіп «Ауыл аманаты» жобасын қаржыландыру мәселесін пысықтауды тапсырды.
Сапар бағдарламасы аясында вице-премьер Қазақ ұлттық су шаруашылығы және мелиорация университетіне барып, оқу орнының профессорлық-оқытушылық құрамымен кездесті. Бұл кездесу білім беру саласындағы өзекті мәселелерді талқылауға, өңірдің су шаруашылығын дамыту және мелиорация мәселелеріне қатысты ғылыми-зерттеу жұмыстарына серпін беруге бағытталды.
Сонымен қатар, Қанат Бозымбаев Тараз қаласындағы жаңа шағынауданда салынып жатқан көпқабатты тұрғын үйлер құрылысы және Түйте каналының жағалауын абаттандыру жұмыстарымен танысты. Бұл жобалар тұрғын үй-коммуналдық инфрақұрылымды жақсарту және қаланың көркін арттыру мақсатында жүргізілуде.
Жалпы, бұл кеңес оңтүстік өңірлердің әлеуетін арттыруға, аймақтар арасында үйлесімді дамуды қамтамасыз етуге, ауыл шаруашылығы мен өнеркәсіп салаларын жаңғыртуға, әлеуметтік қолдауды күшейтуге бағытталған маңызды шаралардың бірі болып табылады. Оңтүстік өңірлердің дамуы — еліміздің тұрақты өсуі мен әлеуметтік тұрақтылығының кепілі екені атап өтілді.
