Бүгін Мемлекет басшысы Қасым-Жомарт Тоқаевтың төрағалығымен Қазақстан халқы Ассамблеясының ХХХІІІ сессиясы өтті.
Салтанатты жиында Жетісу облысындағы «Достық үйінің» директоры Руфина Усанова сөз сөйлеп, Президентті Түркістандағы биыл пайдалануға берілетін «Достық үйінің» ашылу салтанатына шақырды.
– Құрметті Президент мырза, биыл өзіңіздің тапсырмаңызбен түркі әлемінің астанасы киелі Түркістан шаһарында заманауи «Достық үйі» ашылады. Біз, барлығымыз мұны асыға күтудеміз. Бұл алуан түрлі мәдениеттердің орталығына айналады деп үміттенеміз және сізді қадірлі қонақ ретінде көргіміз келеді, — деді ол.
Еске сала кетсек, 2023 жылдың қараша айында облыс әкімі Дархан Сатыбалдының қатысуымен Түркістанда «Достық үйі» ғимаратының алғашқы кірпішін қалау рәсімі өткен болатын.
Президент тапсырмасын іске асыру мақсатында Түркістан қаласының әкімшілік-іскерлік орталығында «Достық үйі» ғимаратына 1391,29 м2 жер телімі бөлінген. «Mataibekov architects» ЖШС жалпы алаңы 3912,29 м2 болатын 4 қабатты ғимараттың жобалық-сметалық құжаттамасы әзірледі. Мердігер мекеме ретінде «INTEGRA CONSTRUKTION KZ» ЖШС анықталып, бүгінгі таңда құрылыс жұмыстары қарқынды жүргізілуде.
Жоспарға сәйкес, «Достық үйінің» құрылысы биыл күзде аяқталып, пайдалануға берілмек.
Түркістан облысы қоғамдық даму басқармасы «Қоғамдық келісім» КММ баспасөз қызметі
