Бүгін Түркістан облысы Жетісай ауданы, Жетісай қаласында ҚМДБ «ЕЛ ҮЛЕСІ-ПӘТЕРГЕ» жобасы аясында мұқтаж, апалы-сіңлілі Умироваларға 756-баспана кілті табыс етілді. Айтулы шараға Түркістан облысының бас имамы Ержан Сматұлы Толепов, Жетісай ауданының бас имамы Айдарбек Садыков және аудандық «Зекет және қайырымдылық» бөлімінің жауапты мамандары қатысты. Бас имам Ержан Сматұлы қуаныш иелеріне:» Әрбір жан өз баспанасында еш алаңсыз, қайғысыз өмір сүргісі келетіні хақ. Бұл өмір сынақ мекені болғандықтан, түрлі ауыртпашылықтар пенденің басына түседі. Сол бір қиындыққа мойымай, сабыр еткен жанға Алла өз сыйын дайындаған. Мінеки, бүгін осындай қиындықтан соң бір ізгі істің келгеніне куә болып отырмыз. Жаратушы Иеміз жаңа баспаналарыңызды құтты, ішін берекелі еткей!»,-деп дұға жасап, 756-баспананың кілтін табыстады. Аудан бас имамы Айдарбек Садыков демеушілік танытқан аудан тұрғындары мен ауыр жүк тасымалындағы қызмет етуші азаматтарға шынайы алғысын білдірді.
