Ақ халатты абзал жандар марапатталды. Бүгінде облыста тұрғындар денсаулығы үшін алдыңғы шепте қызмет етіп жүрген қос дәрігер құрметке бөленді. Медицина саласына ғұмырын арнаған мамандар еңбектері еленгендеріне дән риза.
Түркістан облыстық қоғамдық денсаулық басқарма басшысы Марат Пашимов өңірдегі бұқараның саулығы үшін еңбек сіңірген қайраткерлерді марапаттады.
Соның бірі «Ерен еңбегі үшін» медальімен қошеметке бөленген Еркебай Бектаев. 29 жылға жуық балалар денсаулығын жақсарту үшін еңбек еткен маман үшін атаулы күн алтын әріппен жазылмақ.
Әріптестерінің құрметі мен қошеметіне бөленген Алмас Мамыровтың денсаулық сақтау саласында қызмет етіп келе жатқанына 37 жылдың жүзі болды. Өз қызметін облыстың шалғай өңірлерінде жүріп атқарған азаматты әріптестері бейбіт күннің батырына балайды. Дәрігер тіпті өзінің «Құрмет» орденін иеленетіндігінен де бейхабар болған. Қуанышты хабарды салтанатты жиын барысында естіген ақ халатты, көз жасына ерік берді.
Денсаулық адам үшін баға жетпес байлық. Гиппократ антын қабылдаған, асқан шеберліктің иелері қандай құрметке болсын, лайық!
