Шымкент қаласында санитариялық-эпидемиологиялық және ветеринариялық қауіпсіздікті қамтамасыз ету мақсатында кенелерге, масаларға, кеміргіштерге және шегірткелерге қарсы кешенді өңдеу жұмыстары жалғасуда. Бұл туралы Өңірлік коммуникациялар қызметі алаңында өткен брифинг барысында Шымкент қаласының ауыл шаруашылығы және ветеринария басқармасы басшысының орынбасары Базарбеков Қайрат Мейрханұлы мәлімдеді.
Спикердің айтуынша, тұрғындардың денсаулығын қорғау, жұқпалы аурулардың таралуының алдын алу және қолайлы санитариялық жағдай қалыптастыру мақсатында қала аумағында жыл сайын жоспарлы түрде дезинсекциялық және дератизациялық шаралар ұйымдастырылады. Биылғы жұмыстар да бекітілген кестеге сәйкес кезең-кезеңімен атқарылып жатыр.
Жыл сайын көктем және күз мезгілдерінде жүргізілетін кенеге қарсы залалсыздандыру шаралары биыл да жоспарға сай жүзеге асырылды. Алғашқы кезең 26 наурыз бен 25 мамыр аралығында толық аяқталып, 152 мыңнан астам ауыл шаруашылығы жануарлары өңделді. Сонымен қатар 4,6 миллион шаршы метрден астам қора-жайлар, мал қоралары, саябақтар мен гүлзарлар аумағында залалсыздандыру жұмыстары жүргізілді. Аталған жұмыстарға арнайы техникамен жабдықталған 6 бригада және 18 білікті маман тартылған.
Биылғы бес айдың қорытындысы бойынша қала аумағында Конго-Қырым геморрагиялық қызбасы тіркелген жоқ. Дегенмен кене шағу жағдайымен 475 адам медициналық көмекке жүгінген. Мамандардың мәліметінше, олардың басым бөлігі басқа өңірлерде мал шаруашылығымен айналысу немесе демалыс кезінде кене шағуына ұшыраған. Осыған байланысты тұрғындарға табиғат аясында демалу кезінде сақтық шараларын сақтап, денеге жабысқан кенені өз бетінше жұлып алмауға және дер кезінде медициналық мекемеге жүгінуге кеңес беріледі.
Қалада масаларға қарсы дезинсекциялық шаралар да қарқынды жүргізілуде. Бұл мақсатқа 30 маман мен 20 арнайы техника жұмылдырылған. Өңдеу жұмыстары саябақтарда, өзен-көл арналары, су айдындары мен гүлзарлар аумақтарында кезең-кезеңімен атқарылып жатыр. Бұл шаралар зиянкестердің көбеюінің алдын алып, тұрғындарға қолайлы орта қалыптастыруға бағытталған.
Сонымен қатар сәуір айында кеміргіштерге қарсы көктемгі дератизация жұмыстары толық аяқталды. Нәтижесінде кеміргіштерден зардап шеккендер саны өткен жылмен салыстырғанда айтарлықтай азайған. Мамандар тұрғындар мен кәсіпкерлерді өз нысандарында санитариялық өңдеу жұмыстарын уақытылы жүргізуге, тазалық талаптарын сақтауға және жұқпалы аурулардың алдын алуға бірлесе атсалысуға шақырады.
