Соңғы уақытта коронавирус инфекциясының қайта өршуі көпшілікті алаңдатып отыр. Осыған орай, Түркістан облысының әкімі Өмірзақ Шөкеевтің төрағалығымен өткен апталық аппарат отырысында облыс аумағындағы коронавирус инфекциясын алдын алу мен санитарлық-эпидемиологиялық жағдайға маңыз берілді.
Жиында облыстық қоғамдық денсаулық басқармасының басшысы Марат Пашимов Түркістан облысында эпидемиологиялық жағдай тұрақты екенін айтты. Соңғы он күнде коронавирус дертімен 181 адам тіркелген. Өткен тәулікте 11 тұрғын сырқаттанды. Өлім жағдайлары тіркелген жоқ. Облыс бойынша қажетті инфекциялық төсек-орын ұйымдастырылған. Емделушілер арасында жағдайы ауыр ешкім жоқ.
Басқарма басшысы М. Пашимовтың мәлімдеуінше, коронавирустық инфекцияның әр түрлі сценариіне байланысты инфекциялық төсек-орын санын 3 мыңға ұлғайтуға мүмкіндік бар. Қазіргі уақытта Түркістан облысы КВИ аурушаңдығының көрсеткіші бойынша ҚР бойынша «жасыл» аймақта орналасқан.
Өңірде ревакцинация жұмыстары қарқынды жүргізілуде. Бүгінгі таңға 765 мыңға жуық (84,4%) адам егілді. Мамыр айынан бастап қайта ревакцинациядан 30 мыңға жуық адам өтті. Қазіргі кезде елімізде вакциналау әрі ревакциналау үшін екпенің үш түрі бар. Яғни QazVac, Sinopharm, Pfizer вакциналары ұсынылып отыр. Адам ең алдымен 2 дозамен толық вакцинацициядан өтуі керек. Содан кейін 6 айдан кейін иммунитет төмендей бастайды. Оны зерттеулер көрсетіп отыр. Сондықтан мамандар 6 айдан соң 3-дозаны, тағы 6 айдан соң 4-дозаны алуды ұсынады. Оның адам ағзасына кері әсері жоқ. Қайта коронавирус инфекциясына қарсы ұжымдық иммунитетті сақтап тұрады. Жаңа штамдардың шығуына тосқауыл болады.
Түркістан облысының медициналық ұйымдарында коронавирустық инфекцияны емдеу және диагностикалауға арналған клиникалық хаттамасына сәйкес, дәрілік заттар тапшылығын жою мақсатында дәрі-дәрмектің екі айлық резервтік қоры қалыптастырылған. Дәрігерлердің де дайындық шаралары пысықталған. Атқарылып жатқан жұмыстар тұрақты бақылауда.
Бүкіл әлемдегі сияқты, омикрон ВА.5 штамынан болған COVID-19-дың кезекті толқыны биылғы шілдеде елімізде жүргізілген генетикалық зерттеу нәтижелері бойынша зерттелген үлгілердің 70 пайызында анықталған. Коронавирустың қазіргі штамы (Омикрон ВА.5) жоғары жұқпалығымен сипатталады және дельта нұсқасымен салыстырғанда әлдеқайда ауру жеңіл өтеді. Бұл өз кезегінде науқастардың көпшілігінің амбулаториялық жағдайда емделетіндігімен де расталып отыр.
