Мегаполисте Жастар саясатына көп көңіл бөлінеді. Мемлекет басшысы Жолдауында айтқандай қазақстандықтардың 30 проценті денешынықтыру, бұқаралық спортпен шұғылдануына қол жеткізу мәселесіне Шымкент қаласының әкімдігі жауапкершілікпен қарап отыр.
Қалалық Жастар ресурсы орталығы бұқаралық спортқа балалар мен жасөспірімдерді қызықтыру үшін нассихат жұмыстарын, оның ішінде спорттың әр саласындағы саңлақ спортшыларды үлгі етіп келеді.
Шымкенттік боксшы Фариза Шолтай Дубайда өткен Азия чемпионатында алтын жүлдегер атанды. Фариза Шолтай – «Динамо» қоғамының мүшесі. Боксшы қыз жеңіске жету – қандай жағдайда да үлкен құлшыныс пен серпіліс сыйлайтынын айтады.
Фариза Шолтай, әйелдер боксынан халықаралық дәрежедегі спорт шебері: «Мен 8 жылдан бері бокспен айналысып келемін. Енді міне 2021 жылы Азия чемпионатының жеңімпазы атандым. Азия алтыны, әрине, Олимпиада жүлдесі емес. Дегенмен, мен үшін бұл да үлкен жетістіктердің бастамасы деп білемін. Спортшы алдымен Азияны, содан кейін әлемді, әрмен қарай Олимпиаданы армандауы керек. Сонда ғана армандар орындалады деген сенім мен мақсат пайда болады».
Барлық жарыстарға «Динамо» спорт кешені базасында машықтанып, дайындалатын жас чемпион енді Әлем чемпионатында ең жоғары жеңіс тұғырына ие болуды жоспарлап отыр. Фаризаның айтуынша, ол 2021 жылдың қазан айында өтетін додаға дайындықты бастап кеткен.
Спортшылардың мұндай жетістіктері шымкенттік балалар мен жасөспірімдерді тек дене шынықтырумен шұғылданып қана қоймай атақты спортшы болуға, спортпен тұрақты шұғылдануға дағдыландырады. Бұл – ұлт денсаулығын нығайтудың бір жолы.
