Шымкент қаласы Полиция департамент бастығының бұйрығына сәйкес, қала аумағында жедел жағдайды сауықтыру, отты атыс қарумен жасалған қылмыстардың алдын алу мақсатында 17-мамырдан бастап «Қару» жедел-профилактикалық іс-шарасы өткізілуде,- деп хабарлайды «newqazaq.kz» ақпараттық порталы Шымкент қаласы Полиция департаментінің баспасөз қызметіне сілтеме жасап.
“Қару” жедел-профилактикалық іс-шарасы аясында қазірдің өзінде Шымкент қаласы аумағында тіркелген 6281 қару иесінің (8071 қару) 6213-і тексеріліп, тексеру нәтижесі 98,7%-ды құрады.
Тексеру барысында 159 әкімшілік құқық бұзушылық жайттары анықталып, оның 42-ы — сақтау ережелерінің талаптарын бұзғаны үшін (ҚР ӘҚБтК-нің 484 бабымен), 116 тіркеу ережелерін бұзғаны үшін (ҚР ӘҚБтК-нің 486 бабымен) әкімшілік жауапкершілікке тартылды. Осыған сәйкес 66 бірлік тіркелген қару тәркіленіп, уақытша сақтауға жолданды.
Заңсыз айналымнан 30 бірлік қару және 46 дана оқ-дәрі тәркіленіп алынды. Олар: 3 дана тегіс ұңғылы қару, 1 дана қолдан жасалған қару, 9 дана травматикалық тапанша, 11 дана газды тапанша, 6 дана электрошокер.
Айта кетейік, «Қару» жедел-профилактикалық іс-шарасы ағымдағы жылдың 17-маусымына дейін жалғасты. Іс-шараның суық қарумен абайсызда болатын құқықбұзушылықтың алдын алуда маңызы зор.
