Шымкент қаласында салауатты өмір салтын қалыптастыру, бұқаралық спортты дамыту және қала тұрғындарын белсенді өмір салтына тарту мақсатында «Шымкент-марафон» спорттық-бұқаралық іс-шарасы өтті.
Ауқымды спорттық додаға этнос өкілдері мен Шымкент қаласы Ішкі саясат басқармасының «Қоғамдық келісім» КММ қызметкерлері де белсене қатысты.
Марафон барысында қатысушылар спортқа деген қызығушылықтарын арттырып қана қоймай, қоғамдық бірлік пен өзара ынтымақтастықтың маңыздылығын көрсетті.
Мұндай бұқаралық іс-шаралар қала тұрғындарын ортақ құндылықтар төңірегіне топтастырып, қоғамдағы өзара түсіністік пен достықты нығайтуға ықпал етеді. Әртүрлі этнос өкілдерінің бір алаңда бас қосып, ортақ мақсат жолында бірге әрекет етуі – Қазақстандағы қоғамдық келісім мен тұрақтылықтың маңызды көрінісі. Спорт арқылы салауатты өмір салтын насихаттаумен қатар, өскелең ұрпаққа елге деген сүйіспеншілік, жауапкершілік, ынтымақ және өзара құрмет сияқты құндылықтарды дәріптеуге мүмкіндік туады.
Шымкент қаласында рухани құндылықтар мен патриоттық тәрбиені дамыту бағытында да жүйелі жұмыстар жүргізілуде. Олардың негізгі мақсаты – тұрғындардың туған елге, жерге деген құрметін арттырып, азаматтық жауапкершілігін қалыптастыру. Патриотизм тек мемлекеттік мерекелер мен арнайы іс-шаралар аясында ғана емес, күнделікті қоғамдық өмірде де көрініс табуы тиіс. Осы ретте бір-бірін құрметтеу, қоғамдық тәртіпті сақтау, ортақ іске жауапкершілікпен қарау және ел болашағына бейжай қарамау маңызды.
Сонымен қатар, қоғамдық келісімді сақтау, достық пен өзара сыйластықты нығайтуға бағытталған мәдени, рухани және ақпараттық іс-шаралардың маңызы зор. Қоғамдағы әр азаматтың өзге этнос пен мәдениет өкілдеріне құрметпен қарауы – тұрақты әрі біртұтас қоғам қалыптастырудың негізі. Әділдік пен ынтымақ, сенім мен жауаптылық қағидаттарын берік ұстану да ел бірлігін нығайта түседі.
Дін саласында да тұрақтылықты сақтау, діни сауаттылықты арттыру және зайырлы мемлекет қағидаттарын түсіндіру бағытындағы жұмыстардың маңызы ерекше. Жастар арасында радикалды идеологиялардың алдын алу, дәстүрлі рухани құндылықтарды дәріптеу және қоғамда бейбітшілік пен келісім мәдениетін қалыптастыру – ортақ міндет.
Мемлекеттік рәміздерге құрмет көрсету де патриоттық тәрбиенің ажырамас бөлігі. Қазақстан Республикасының Туы, Елтаңбасы мен Әнұраны – ел тәуелсіздігі мен мемлекеттілігінің қасиетті нышандары. Оларға ұқыпты әрі құрметпен қарау әр азаматтың елге деген сүйіспеншілігі мен жауапкершілігін көрсетеді.
Осы тұрғыдан алғанда, «Шымкент-марафон» секілді іс-шаралар – салауатты өмір салтын насихаттайтын спорттық дода ғана емес, қоғам мүшелерін бірлікке, достыққа және өзара қолдауға үндейтін маңызды қоғамдық бастама.
