Шымкент қалалық Қазақстан халқы Ассамблеясының медиаторлары Төтенше жағдайлар қызметінің қызметкерлерімен кездесіп, қоғамдық келісім мен тұрақтылықты нығайту, медиацияның қоғамдағы орны мен маңызы, сондай-ақ киберқауіпсіздік мәселелері бойынша ақпараттық-түсіндіру жұмыстарын жүргізді.
Кездесудің негізгі мақсаты – қоғамдағы өзара түсіністік пен сенім құндылықтарын дәріптеу, азаматтар арасында туындауы мүмкін даулы жағдайлардың алдын алу және оларды өркениетті жолмен шешудің тиімді тетіктерін түсіндіру. Іс-шара барысында медиацияның қоғамдық келісім мен тұрақтылықты нығайтудағы рөлі кеңінен тарқатылып айтылды.
Мамандардың айтуынша, кез келген даулы мәселені күш көрсету немесе жанжал арқылы емес, өзара құрметке негізделген ашық диалог пен мәміле арқылы шешу – өркениетті қоғамның маңызды қағидаларының бірі. Медиация тараптардың ортақ шешімге келуіне мүмкіндік беріп қана қоймай, адамдар арасындағы сенім мен өзара түсіністікті қалыптастыруға ықпал етеді. Бұл ретте медиатордың міндеті – тараптарды татуластыруға жағдай жасап, олардың құқықтары мен заңды мүдделерін ескере отырып, өзара тиімді шешім табуға көмектесу.
Кездесуде татулық пен бірліктің қоғам тұрақтылығын қамтамасыз етудегі маңызына да ерекше назар аударылды. Қазақстан үшін қоғамдық келісім мен этносаралық татулық – ел дамуының маңызды негіздерінің бірі. Әр азаматтың бір-біріне құрметпен қарап, жауапкершілік танытуы, өзара түсіністік пен ынтымақты сақтау – тұрақты қоғам қалыптастырудың басты шарттары екені атап өтілді.
Сонымен қатар, ақпараттық-түсіндіру жұмыстарының маңызды бағыты ретінде киберқауіпсіздік мәселесі қозғалды. Киберқауіпсіздік саласының мамандары қазіргі таңда жиілеп отырған интернет-алаяқтық әрекеттері, цифрлық кеңістіктегі қауіп-қатерлер және олардан қорғану жолдары туралы жан-жақты ақпарат берді.
Қатысушыларға жеке деректердің қауіпсіздігін сақтау, күмәнді сілтемелерге өтпеу, белгісіз нөмірлерден келетін қоңыраулар мен жалған хабарламаларға сақтықпен қарау, банк карталарының деректері мен құпия кодтарды бөгде адамдарға жария етпеу жөнінде маңызды кеңестер айтылды. Сондай-ақ интернеттегі кез келген ақпаратқа сын көзбен қарап, күмәнді жағдайларда тиісті органдарға жүгіну қажеттігі түсіндірілді.
Кездесу барысында айтылған мәселелердің барлығы азаматтардың құқықтық және цифрлық сауаттылығын арттыруға, өзара сенім мен жауапкершілік мәдениетін қалыптастыруға бағытталды. Мұндай ақпараттық-түсіндіру іс-шаралары қоғамдағы татулық пен тұрақтылықты нығайтып, азаматтардың қауіпсіз әрі жауапты мінез-құлқын қалыптастыруға өз үлесін қосады.
ТАТУЛЫҚ ПЕН БІРЛІК – ҚОҒАМ ТҰРАҚТЫЛЫҒЫНЫҢ ТІРЕГІ
