Түркістанда дуальды оқыту жүйесін жетілдіру және өндірістегі тәлімгерлердің кәсіби біліктілігін арттыруға бағытталған 16 сағаттық оқыту курсы өз мәресіне жетті. Екі күнге созылған оқыту бағдарламасы Түркістан облысы Кәсіпкерлер палатасының ұйымдастыруымен өткізіліп, дуальды оқытуға қатысушы кәсіпорындар мен ұйымдардың тәлімгерлерін қамтыды.
Курстың екінші күні өндірістегі тәлімгерлік тәжірибені жетілдіру, практикалық кейстерді талдау, коммуникациялық дағдыларды дамыту және тәлімгерлерді сертификаттау мәселелеріне арналды.
«Өндірістегі тәлімгерлік тәжірибе және практикалық кейстер» модулі аясында қатысушылар жұмыс орнында оқытудың нақты жағдайлары мен тиімді шешімдерін талқылады. Сонымен қатар, «JASYL SUYQ QAZAQSTAN» ЖШС-нің персоналды басқару жөніндегі директоры Айгүл Ташбенбетова өндірістік тәлімгерліктегі озық тәжірибелер мен нәтижелі тәсілдер жөнінде баяндама жасады. Ал «Turkistan Hub» менеджері Бекзат Әбсадық тәлімгерлік оқытудағы инновациялық әдістер мен практикалық модельдерді таныстырды.
Түстен кейінгі бөлімде тәлімгерлердің коммуникативтік және бағалау құзыреттерін дамыту мәселелері қаралды. «Rakhat Group» кәсіпорнының басшысы Төлбасы Бекмырза тиімді коммуникация, мотивация, қақтығыстарды басқару, эмоционалдық интеллект және психологиялық тәсілдер тақырыптарында тәжірибесімен бөлісті. Сондай-ақ қатысушылар ашық диалог алаңында пікір алмасып, өндірістегі тәлімгерлік қызметтің өзекті мәселелерін талқылады.
Екі күндік оқыту курсының қорытындысында қатысушыларға сертификаттар табысталды. Марапаттау рәсімін Түркістан облысы Кәсіпкерлер палатасы директорының шағын кәсіпкерлікті дамыту жөніндегі орынбасары Ербол Әуелбеков жүргізіп, тәлімгерлерге алдағы қызметтеріне сәттілік тіледі.
«Дуальды оқыту жүйесінің тиімділігі ең алдымен өндірістегі тәлімгерлердің кәсібилігіне байланысты. Бүгінгі курстың басты мақсаты – тәлімгерлердің білімін жетілдіріп қана қоймай, өндіріс пен білім беру ұйымдары арасындағы байланысты нығайту. Осындай оқыту бағдарламалары арқылы біз еңбек нарығының сұранысына сай білікті мамандар даярлауға нақты үлес қосып келеміз. Сертификат алған әрбір тәлімгер өз кәсіпорнында жас мамандарға бағыт-бағдар беретін кәсіби көшбасшы боларына сенімдімін», – деді ол.
Айта кетейік, өңірде дуальды оқыту жүйесі қарқынды дамып келеді. Бүгінде Түркістан облысындағы 36 колледжде дуальды оқыту жүзеге асырылып, мыңдаған студент теориялық білімді өндірістік тәжірибемен ұштастырып келеді.
