Тәуелсіз Қазақстан – бүгінде ұлттық құндылықтар мен өркениеттің көшін тең ұстаған, тұрақтылық пен бірліктің символына айналған қасиетті мекен. Еліміздің әрбір аймағы осы ортақ Отанның қуатын арттыруға өзіндік үлес қосып келеді. Соның ішінде, ұлттық код пен салт-дәстүрдің қаймағы бұзылмаған оңтүстік өңір, соның ішінде Шымкент мегаполисі – отансүйгіштік сезімнің шынайы мектебіне айналды. Мұндағы халықтың бойындағы мемлекетшілдік рух құрғақ ұрандармен емес, күнделікті тіршіліктегі мәдениет, білімге ұмтылыс және ел игілігіне бағытталған нақты істер арқылы айқын көрініс тауып отыр.
Бүгінгі таңда қала тұрғындарының, әсіресе өскелең ұрпақтың бойында азаматтық жауапкершілікті қалыптастыру бағытында заманауи жобалар жүзеге асырылуда.
Патриотизмді арттырудың басты тетігі ретінде өңірдің бай тарихи мұрасын зерделеу қолға алынған. «Мәртөбе» секілді тарихи орындар мен заманауи мәдени ошақтар жастардың ұлттық бірегейлігін айшықтайтын басты бағдарға айналды. Мұнымен қоса, қала жастары арасында әскери-патриоттық бағыт өте танымал. «Жас сарбаз» сыныптары мен арнайы клубтар жасөспірімдерді тәртіпке, Отан алдындағы парызды терең сезінуге баулып келеді. Отансүйгіштік тек әскери дайындықпен шектелмей, қоршаған ортаны аялау мәдениетімен де ұштасып жатыр. Қаланы жасыл желекке айналдыру, тазалық акциялары мен экологиялық бастамалар тұрғындарды ортақ мақсатқа біріктіретін негізгі күшке айналды.
Қазіргі қоғамдағы отансүйгіштіктің басты өлшемі – адал еңбек пен айналаға деген қамқорлық. Шымкенттіктер арасында бұл қасиеттер өмірлік ұстанымға айналып үлгерген.
«Шынайы патриот – мемлекеттен не аламын деп емес, Отаныма қандай пайда әкелемін деп өмір сүретін, өз ісіне адал әрі жауапты тұлға. Қазіргі заманның батыры – маңдай терімен ел игілігін еселеп жүрген қарапайым еңбек адамы».
Мегаполисте волонтерлік қозғалыстың ауқымы кеңейіп, мыңдаған жастар мұқтаж жандарға қол ұшын созуды, қоғамдық шараларға демеу болуды өздерінің азаматтық парызы санайды. Сонымен қатар, жастар арасында маңдай термен табыс табу, кәсіби шеберлікті шыңдау және техникалық мамандықтарды игеру трендке айналды. Бұл үрдіс «Адал азамат» тұжырымдамасының аймақта сәтті жүзеге асып жатқанының айқын дәлелі.
Қазақстанның жарқын болашағы әрбір азаматтың жүрегіндегі елге деген сүйіспеншіліктен құралады. Шымкент қаласында бұл сезім тұрғындардың бірлігімен, қонақжайлылығымен және жасампаз еңбегімен өріліп отыр. Ұлттық құндылықтарды ардақтайтын, мемлекеттің дамуына өз үлесін қосуға ұмтылатын рухы биік шымкенттіктердің бұл қадамы – тұтас еліміздің тұрақтылығы мен өркендеуінің кепілі.
