Шымкент қаласында «Зайырлылық – құқықтық мемлекет пен қоғамдық тұрақтылықтың негізгі принципі» тақырыбында семинар өтті.
Қазақстан Республикасы Мемлекеттік қызмет істері агенттігі төрағасының 2026 жылға арналған Әдеп жөніндегі уәкілдердің үлгілік жұмыс жоспарына сәйкес Әл-Фараби атындағы қалалық ғылыми-әмбебап кітапханасында Шымкент қаласының жергілікті атқарушы органдарының мемлекеттік қызметшілеріне арналған ақпараттық семинар ұйымдастырылды.
Семинар барысында:
— «Қазақстан Республикасының мемлекеттік қызметі туралы» заң талаптары;
— ойын бизнесі мекемелеріндегі құмар ойындарға және бәс тігуге қатысуға қатысты заңнамалық шектеулер;
— қоғамдық орындарда алкогольдік, есірткілік және уытқұмарлық масаң күйдің алдын алу;
— мемлекеттік органдарда әйелдерге қатысты кемсітушілік пен жыныстық қудалауға жол бермеу;
— мемлекеттік қызметшілердің деструктивті діни ағымдардың ықпалына түсуінің алдын алу мәселелері кеңінен талқыланды.
Семинарға Қазақстан Республикасы Мемлекеттік қызмет істері агенттігінің Шымкент қаласы бойынша департаментінің бас маманы С. Забиров, Шымкент қалалық полиция департаменті қоғамдық қауіпсіздік басқармасы бастығының орынбасары Д. Алиев, сондай-ақ Шымкент қаласының дін істері басқармасына қарасты «Дін мәселелерін зерттеу орталығы» КММ теолог маманы Ұ. Алиакбарұлы қатысты.
Кездесу барысында зайырлылық қағидатының құқықтық мемлекет құрудағы және қоғамдық келісім мен тұрақтылықты сақтаудағы маңызды рөлі айтылып, қатысушылар тарапынан қойылған сұрақтарға заң талаптарына сәйкес жан-жақты жауаптар берілді.
Зайырлылық – қоғамдағы татулық пен тұрақтылықтың, құқық пен жауапкершіліктің берік негізі.
Мемлекеттік қызмет — бұл үлкен абыроймен қатар, қоғам алдындағы жоғары жауапкершілік. Сондықтан әрбір мемлекеттік қызметшінің іс-әрекеті, моральдық бейнесі және заң талаптарын мүлтіксіз орындауы тұрақты бақылауда болады. Әсіресе, Әл-Фараби атындағы кітапханада өткен бұл ақпараттық жиынның мемлекеттік қызметшілер арасындағы құқықтық мәдениетті нығайтуда, сондай-ақ соңғы заңнамалық өзгерістерді дер кезінде түсіндіруде маңызы зор.
Қазіргі таңда елімізде құмар ойындар мен бәс тігуге (лудоманияға) қарсы мемлекеттік деңгейде қатаң күрес жүріп жатыр. Мемлекеттік қызметшілердің ойын мекемелеріне баруына және ставкалар қоюына заң жүзінде тыйым салынуы — билік аппаратының беделін сақтауға және сыбайлас жемқорлық тәуекелдерінің алдын алуға бағытталған маңызды қадам. Сонымен қатар, қоғамдық орындардағы тәртіпті сақтау мен кез келген зиянды әдеттерден аулақ болу да Әдеп кодексінің басты талаптарының бірі болып табылады. Жиында полиция департаменті өкілінің қатысуы осы бағыттағы профилактикалық шаралардың құқықтық негіздерін нақтылай түсті.
Семинарда ерекше тоқталған тағы бір өзекті мәселе — мемлекеттік органдардағы гендерлік теңдік және әйелдерге қатысты кемсітушілік пен қудалаудың кез келген көріністеріне жол бермеу. Заманауи құқықтық қоғамда жұмыс орнында қолайлы әрі қауіпсіз психологиялық орта қалыптастыру — еңбек өнімділігін арттырудың кепілі. Мұнымен қоса, зайырлылық қағидатын берік ұстана отырып, қызметкерлер арасында деструктивті діни ағымдардың алдын алу — ішкі тұрақтылықты қамтамасыз етеді. Дін және мемлекеттік қызмет істері мамандарының кешенді түсіндірмелері мемлекеттік қызметшілердің кәсіби біліктілігін ғана емес, олардың заң алдындағы жауапкершілігін де арттыра түсті. Мұндай жүйелі шаралар Шымкент қаласындағы жергілікті атқарушы органдардың ашық, әділ және халыққа мінсіз қызмет ететін заманауи мемлекеттік аппарат үлгісін қалыптастыруға септігін тигізеді.
