1 маусым — Халықаралық балаларды қорғау күніне орай Шымкент қалалық ҚХА жанындағы татар-башқұрт этномәдени бірлестігінің өкілдері қаладағы №6 арнаулы әлеуметтік қызметтер көрсету балалар орталығына арнайы барып, ерекше қамқорлықты қажет ететін бүлдіршіндерді мерекемен құттықтады.
Тағылымы мол шара барысында 25 балаға арнайы сыйлықтар табысталып, оларға шаттық пен көтеріңкі көңіл күй сыйланды. Ізгілік пен жан жылуын арқау еткен кездесуде ақжарма тілектер айтылып, балалардың жүзіндегі қуаныш нұры көпшілікке ерекше әсер қалдырды.
Бала — ұлттың болашағы, елдің ертеңі. Сондықтан өскелең ұрпаққа meйірім мен қамқорлық көрсету — барша қоғамның ортақ парызы. Балалардың алаңсыз күлкісі мен бақытты жанары — бейбіт әрі берекелі қоғамның айқын көрінісі.
Халықаралық балаларды қорғау күні — бұл жай ғана күнтізбедегі мерекелік күн емес, бұл ең алдымен ересектер қауымына өскелең ұрпақтың құқықтары мен денсаулығын қорғау, олардың лайықты болашағын қамтамасыз ету жауапкершілігін еске салатын маңызды күн. Әсіресе, тағдырдың жазуымен ерекше күтім мен арнаулы әлеуметтік көмекке зәру болып отырған балаларға қолдау көрсету — қоғамның толысқандығы мен гуманистік құндылықтарының басты өлшемі болып табылады.
Шымкент қаласындағы татар-башқұрт этномәдени бірлестігінің бұл бастамасы Қазақстан халқы Ассамблеясының басты мақсаттарының бірі — елдегі бірлік пен ынтымақтастықты, әлеуметтік жауапкершілікті арттыру идеясымен тікелей үндеседі. Этномәдени бірлестіктер тек мәдени құндылықтарды дәріптеп қана қоймай, осындай маңызды әлеуметтік және қайырымдылық жобалардың белсенді қатысушысына айналып отыр. Мұндай ізгі істер қоғамдағы мейірімділік пен өзара көмек көрсету мәдениетін жаңа деңгейге көтереді.
Мамандардың айтуынша, ерекше мұқтаждығы бар балалар тәрбиеленіп жатқан орталықтарға бару, оларға тек материалдық тұрғыдан ғана емес, рухани демеу болу, жылы лебіз білдіріп, уақыт бөлу — балалардың әлеуметтік ортаға бейімделуіне оң әсерін тигізеді. 25 бүлдіршінге қуаныш сыйлаған бұл шара өзге де қоғамдық ұйымдар мен кәсіпкерлерге үлгі болары сөзсіз. Қайырымдылық — науқандық шара емес, ол әрбір азаматтың ішкі жан дүниесінің қажеттілігі мен күнделікті өмірлік ұстанымына айналуы тиіс. Сонда ғана біз әрбір бала өзін қауіпсіз, бақытты және қоғамға керек сезінетін берекелі ортаны қалыптастыра аламыз.
