Мемлекет басшысы айқындаған «Заң мен тәртіп» идеологиясы қоғамдағы құқықтық мәдениетті нығайтуға, азаматтардың заңға деген құрметін арттыруға және тәртіп қағидаттарын берік қалыптастыруға бағытталған маңызды бастама болып табылады. Бұл қағидат әскери сала үшін де ерекше маңызға ие.
Әскери қызмет – жоғары жауапкершілікті, тәртіп пен адалдықты талап ететін сала. Сондықтан әскери ортада заң талаптарын қатаң сақтау, әскери антқа адал болу және қызметтік міндеттерді мінсіз орындау – әрбір әскери қызметшінің басты міндеті. Заң үстемдігі қамтамасыз етілген жерде тәртіп те, сенім де нығая түседі.
Құқық бұзушылықтардың алдын алу мақсатында әскери қызметшілер арасында құқықтық түсіндіру жұмыстары тұрақты жүргізіліп келеді. Қызметтік тәртіпті сақтау, сыбайлас жемқорлыққа қарсы мәдениетті қалыптастыру, әскери әдеп нормаларын сақтау мәселелері әрдайым басты назарда болуы тиіс. Себебі кез келген құқық бұзушылық әскери ұжымның беделіне ғана емес, жалпы мемлекеттік қызметке деген сенімге де кері әсерін тигізеді.
«Заң мен тәртіп» қағидаты ең алдымен әр адамның жеке жауапкершілігінен басталады. Әрбір әскери қызметші өз әрекетінің заң аясында болуына, қызметтік міндеттерін адал әрі сапалы атқаруына мән беруі қажет. Әскери ортадағы тәртіп – мемлекет қауіпсіздігінің маңызды кепілі.
Сонымен қатар, құқық бұзушылықтардың алдын алуда профилактикалық жұмыстардың рөлі зор. Ұжым ішінде өзара сыйластықты қалыптастыру, моральдық-психологиялық ахуалды бақылау, қызметкерлердің ұсыныс-пікірлеріне құлақ асу – тұрақты әрі тиімді жұмыстың негізі.
Заңға құрмет пен тәртіпке бағыну – өркениетті қоғамның айқын белгісі. Әскери қызметшінің кәсібилігі тек қызметтік міндеттерді орындаумен емес, оның заң талаптарын сақтау деңгейімен де бағаланады. Сондықтан «Заң мен тәртіп» қағидатын күнделікті қызметтің басты ұстанымына айналдыру – баршамыздың ортақ міндетіміз.
А.СЕРІКБАЕВ,
Шымкент гарнизоны әскери соты әкімшісінің басшысы.
