Келес ауданының орталығы — Абай ауылында инфрақұрылымды жаңарту және тұрғындарға жайлы орта қалыптастыру бағытында ауқымды жұмыстар басталды. Аудан әкімі Жәнібек Ағыбаев арнайы ауыл ішіндегі құрылыс және абаттандыру нысандарын аралап, жауапты тұлғаларға бірқатар маңызды тапсырмалар жүктеді.
Аудан басшысы алдымен ауылдың басты көрікті жерлерінің бірі — Әбжапар Жылқышиев атындағы гүлзарға барды. Қазіргі таңда бұл демалыс орнын Ошақты каналына дейін созу жоспарлануда. Бүгінде жобаның алғашқы кезеңі ретінде Б. Қырғызәлиев және Абай көшелерінің аралығында жұмыс қызу жүргізілуде.
Құрылыс алаңында жерді тегістеу және жаяу жүргіншілерге арналған жолақтарды салу жұмыстары аяқталуға жақын. Сонымен қатар, автомобиль жолының орны нақтыланып, асфальт төсеуге қажетті дайындық шаралары жүргізілуде. Нысанның барысын бақылаған Жәнібек Есенұлы гүлзар аумағындағы ескі нысандарды жаңартуды және мемлекет мұқтажы үшін алынатын ғимараттарды алу процесін жеделдетуді тапсырды.
– «Гүлзарды созу — жай ғана жол салу емес, бұл ауылдың сәулеттік келбетін өзгертетін маңызды жоба. Сондықтан жұмыс сапалы әрі белгіленген кестеге сай орындалуы тиіс. Орталық көшелердің бойы заманауи талаптарға сай болып, халықтың серуендеуіне барынша қолайлы жағдай жасалуы қажет», — деді Жәнібек Ағыбаев.
Бұдан кейін аудан әкімі Араншы каналының бойындағы жаңадан салынған демалыс аймағына келді. Мұндағы атқарылған жұмыстарды оң бағалай отырып, әкім жобаның әлеуетін одан әрі арттыру қажеттігін атап өтті.
Жобаның негізгі мақсаты — ауыл тұрғындарына, әсіресе жастар мен балаларға қолайлы демалыс аймағын қалыптастыру. Канал бойының табиғи ландшафты тиімді пайдаланылып, жасыл аймақ ретінде дамыту көзделуде. Бұл өз кезегінде ауылдың экологиялық жағдайын жақсартып, тұрғындардың өмір сапасын арттыруға ықпал етеді.
Тұрғындардың, әсіресе жастар мен балалардың бос уақытын тиімді өткізуі үшін канал бойына қосымша воркаут (Workout) және балалар ойын алаңшаларын орнату туралы шешім қабылданды. Бұл бастама салауатты өмір салтын насихаттап қана қоймай, жасөспірімдердің спортқа деген қызығушылығын арттыруға мүмкіндік береді.
Ауыл әкімі Асыбек Жұмановқа Араншы каналының бойын Ж. Абуов және М. Артықов көшелеріне дейін, сондай-ақ аудандық сот ғимаратына дейінгі аумақты абаттандыру мен көгалдандыру бойынша жаңа жобалар дайындау тапсырылды. Сонымен қатар, жарықтандыру жүйесін жаңарту, қауіпсіздік инфрақұрылымын күшейту және демалыс орындарын көбейту мәселелеріне де ерекше назар аудару қажеттігі айтылды.
Соңғы жылдары Келес ауданында тұрғындардың өмір сүру сапасын арттыруға бағытталған бірқатар ауқымды жобалар жүзеге асырылуда. Атап айтқанда, саябақтар мен гүлзарларды жаңғырту, канал бойларын абаттандыру, жаңа спорт және балалар алаңшаларын салу жұмыстары қарқын алған.
Мамандардың пікірінше, мұндай инфрақұрылымдық жобалар ауылдардың әлеуметтік-экономикалық дамуына оң әсер етеді. Жайлы қоғамдық кеңістіктердің көбеюі тұрғындардың бір-бірімен қарым-қатынасын нығайтып, ауыл өмірін жандандырады. Сонымен қатар, көркейтілген орта жастардың туған жерге деген сүйіспеншілігін арттыруға ықпал етеді.
Ә. Жылқышиев гүлзары мен Араншы каналы бойындағы абаттандыру жұмыстары аяқталғаннан кейін Абай ауылының орталық бөлігі жаңа келбетке ие болып, тұрғындар үшін заманауи демалыс аймағына айналмақ. Алдағы уақытта мұндай жобалар ауданның өзге де елді мекендерінде жалғасын табады деп күтілуде.
