Шымкент қалалық кәсіпкерлер палатасында қырғыз делегациясымен ауқымды кездесу өтті. Жиынға Қырғызстан Республикасы Экономика министрлігінің басқарма басшысы Искандербек Маматов, Кәсіпкерлер палатасының директоры Сабира Адамбекова, Symkent Invest АҚ Инвестициялар жұмылдыру орталығының директоры Болат Етекбаев, «Даму саясатының институты» қоғамдық бірлестігінің басқарма төрайымы Надежда Добрецова, шымкенттік және қырғызстандық кәсіпкерлер қатысты.
Кездесуде екі ел арасындағы, оның ішінде бауырлас ел кәсіпкерлерінің Шымкенттің бизнес өкілдерімен тығыз байланысты одан әрі нығайту, өзара тиімді байланыстарды жаңа деңгейге шығару барысы талқыланды.
«Қазақстан мен Қырғызстан арасындағы тауар айналымының көлемі 2025 жылы 2,2 млрд АҚШ долларын құрап, соңғы жылдардағы ең жоғары рекордтық көрсеткішке жетті. Оның ішінде былтыр Шымкент қаласының кәсіпорындары Қырғызстанға 68,3 млн АҚШ доллары көлемінде тауар экспорттады. Оның негізгі бөлігін ұн (12,5 млн), цемент (6,5 млн), пластмасса бұйымдары (4,4 млн), кондитерлік өнімдер (1,9 млн) және басқа да тауарлар құрайды.
Қырғызстаннан 14,4 млн АҚШ доллары көлемінде тауар импортталған. Оның ішінде пластмасса бұйымдары (5,7 млн), мұнай өнімдері (2,0 млн), керамикалық плиталар (1,5 млн), бояулар (0,7 млн) және басқа да өнімдер бар.
Қазіргі таңда Шымкент қаласында Қырғызстанның қатысуымен 32 компания тіркелген, оның 23-і белсенді жұмыс істейді. Бұл компаниялар негізінен сауда, өңдеу өнеркәсібі, денсаулық сақтау және қызмет көрсету салаларында қызмет атқарады», – деді Сабира Адамбекова.
Қонақтарға «Атамекен» ҰКП құрылымы, кәсіпкерліктің дамуы бойынша жұмысы және мемлекеттік органдармен өзара байланысы туралы кеңінен мәлімет берілді.
Ал «Symkent Invest» АҚ өкілі Болат Етекбаев Шымкент қаласындағы индустриалды аймақтар, арнайы экономикалық аймақтардың құрылу принципі, өндірістікке, жұмыс процесіне қолайлы жағдай жасау, арнайы экономикалық аймақтағы кәсіпкерлерге қарастырылған жеңілдіктер барысы туралы кеңінен мәлімет берді.
Кездесу барысында қырғыз делегациясының мүшелері де сөз алып, іскерлік қауымдастықтар, кәсіпкерлік жайлы таныстырды, екі жақты іскерлік байланысты нығайту, өзара тиімді келісім-шарттар жасасу, ортақ жобалардың санын арттыру жайында ой-пікірлерін жеткізді.
«Ат-Башы аудандық кәсіпкерлік қауымдастығы 2024 жылы құрылған. 7 кластер – ет, сүт, бал, балық, қарақат пен бүлдірген, дәрілік шөптер және туристік бағыт бойынша жұмыс істейді. Негізгі миссиямыз – кәсіпкерлер мен мемлекеттік ұйымдар арасындағы әріптестікті дамыту, қуатты әрі тиімді іскерлік саясатты жүргізу және бизнестің бәсекеге қабілеттілігін дамыту.
Осы мақсатта 2023 жылы өңірімізде бизнес-форум, ал 2024 жылы агрофорум өткіздік. Көрші елдердің арасынан алғаш болып Қазақстанға келіп отырмыз. Мұндағы мақсатымыз – бизнесті дамыту бойынша тәжірибе алмасу, байланысты нығайту», – деді Ат-Башы аудандық кәсіпкерлер қауымдастығының төрайымы Сымбат Аттокурова.
Көрші ел өкілдерін Қазақстандағы кәсіпкерліктің дамуы, инвестицияға қолайлы жағдай жасау, жергілікті биліктің қолдауы, мемлекеттік органдармен жұмыс істеу тәжірибелері қызықтырды.
Жиын соңында Шымкент қаласының Кәсіпкерлер палатасы мен Ат-Башы және Ноокат кәсіпкерлер ассоциацияларының арасында ынтымақтастық меморандумына қол қойылды.
