Астана қаласында Қазақстан Республикасының «Атамекен» Ұлттық кәсіпкерлер палатасы ұйымдастырған съез алдындағы кездесу өтті. Кәсіпкерлердің өзекті мәселелері талқыланған жиынға Түркістан облысы кәсіпкерлер палатасы жанындағы Өңірлік кеңес төрағасы, облыстық мәслихат төрағасы Нұралы Әбішов, өңірлік кеңес мүшесі, облыстық мәслихат депутаты Инара Намазбаева, Түркістан облысы кәсіпкерлер палатасының директоры Асылан Ибадуллаев, съез делегаттары, сондай-ақ өңірлік кеңес мүшелері қатысты. Кездесу барысында еліміздегі кәсіпкерлік сала мен бизнес-қоғамдастықты алаңдататын негізгі түйткілдер ортаға салынды.
Шараның басты мақсаты – кәсіпкерлер мен мемлекеттік органдар арасындағы ашық диалогты күшейту. Сондай-ақ өңірлік бизнестің мүдделерін ұлттық деңгейде қорғау және кәсіпкерлік қызметті дамытуға қолайлы жағдай жасау.
«Өңірлік кеңестің басты мақсаты – кәсіпкердің мәселесін қағаз жүзінде қалдырмай, нақты шешімге жеткізу. Былтырғы жылы біз аудандарға шығып, кәсіпкерлермен бетпе-бет кездесіп, әр мәселені жеке бақылауға алдық. Нәтижесінде өндіріс тоқтаған жоқ, экспорт сақталды, жұмыс орындары құрылды. Бұл – кеңестің ең басты жетістігі. Өткен жылы Түркістан облысы Өңірлік кеңесінің 8 отырысы өтіп, 41 мәселе қаралды. Аудан, қала кәсіпкерлерін жеке қабылдау барысында 34 проблемалық мәселе көтеріліп, олардың басым бөлігі нақты шешімін тапты», – деді Нұралы Әлмаханұлы.
Басқосу аясында өңір кәсіпкерлері атынан барлығы 12 маңызды мәселе көтерілді. Аталған сұрақтар өңір кәсіпкерлерінің ұсыныстары мен проблемаларын қамтып, салалық бағыттар бойынша жүйеленді. Бұл мәселелер ертең, яғни 23 қаңтар күні негізгі съез шеңберінде қарастыру үшін ұсынылды.
Жиын қорытындысы бойынша республика аумағындағы өңірлерден ұсынылған мәселелер мен бастамалар ҚР «Атамекен» ҰКП съезінің күн тәртібіне енгізілетін болады. Көтерілген мәселелерді зерделеу нәтижесінде кәсіпкерлердің ұсыныстары уәкілетті мемлекеттік органдарға жолданды.
