Палатада өткен үшжақты кездесуде кәсіпкер мен мемлекеттік мекеме арасындағы мемлекеттік сатып алу шартынан тыс орындалған жұмыстарға төлем жасау мәселесі қаралды.
Оқи отырыңыз...
Кездесуге Кентау қаласы білім бөлімі өкілдері, «Өзбекәлі Жәнібеков атындағы көп салалы мектеп-гимназиясы» басшылығы және «ЖК Онбаев» кәсіпкерлік субъектісі қатысты.
«ЖК Онбаев» басшысы Зұлпыхар Онбаевтың айтуынша, 2024 жылы жасалған келісім-шарт аясында жұмыстарды орындау кезінде Тапсырыс беруші мамандары жобалық-сметалық құжаттаманың (ПСД) кейбір тармақтарының СНиП талаптарына сәйкес келмейтінін анықтаған. Осыған байланысты мердігер бөлшектерді ауыстыруға мәжбүр болып, қосымша жұмыстарды атқарған. Алайда бұл өзгерістер қосымша келісіммен рәсімделмей, төлем жүргізілмеген.
Түркістан облысы кәсіпкерлер палатасы кәсіпкердің құқығын қорғауды басты назарға алды. Палата директорының орынбасары Зухра Амирова өз сөзінде:
«Кәсіпкерлердің еңбегі ескерусіз қалмауы тиіс. Бірақ кез келген шешім заң талаптарына сай қабылдануы қажет. Біздің басты мақсатымыз – кәсіпкердің мүддесін қорғау», – деді.
Тараптар атқарылған қосымша жұмыстардың нақты көлемі мен құнын есептеп, смета негізінде рәсімдеуге уағдаласты. Егер Тапсырыс беруші актіге қол қоймай, төлем жасамаса, кәсіпкер сотқа жүгінетін болады.
Бұл кездесу Палатаның кәсіпкерлердің құқығын қорғаудағы белсенділігін тағы да көрсетті. Палата әрбір даулы жағдайды заң аясында әділ шешуді жалғастыруда.
