Президент Қасым-Жомарт Тоқаев биылғы жылға арнаған Жолдауында, одан кейінгі жиындарда, қазақстандықтарға арнаған сөздерінде бүгінгі күні індеттен құтылудың басты жолы – вакцина егу екенін үнемі айтып келеді. Күні кеше болған жиында да осы мәселеге жауапкершілікпен қарап, халқымызды аман алып қалуды тапсырды.
Дегенмен, халықтың арасында алып-қашпа әңгімеге еріп, вакцина ектіруден қашқақтаушылар бар. Еліміздің үшінші мегаполисінде өткен жиында қала әкімі Мұрат Әйтенов те қарамағындағыларға індетпен күресті күшейтіп, карантин талаптарын қатаң сақтауды, тұрғындардың вакцина ектіруін көбейту үшін түсіндіру жұмыстарын күшейтуді шегелеп тапсырды. Өйткені, індетпен күресте әзірге вакциналаудан басқа тиімді әдіс табылмай тұр.
Бірақ, шымқалалықтар арасында әлі де екпе алудан бас тартушылар аз емес. Сондайлардың кесірінен және жалпы індеттің күшеюінен Шымкентте эпидемиялогиялық ахуал күннен-күнге күрделеніп келеді. Қалада жыл басынан бері коронавирус жұқтырған 240 адам қайтыс болды.
Қауіпті инфекция жұқтырып көз жұмғандардың ешқайсысы коронавирусқа қарсы вакцина алмаған. Бұл туралы қалалық денсаулық сақтау басқармасының басшысы Бақытжан Позилов мәлімдеді.
«Өткен тәуліктің өзінде ковидке шалдыққан 412 науқас анықталған. Қазір инфекциялық стационарда 1774 адам ем алып жатыр. Оның ішінде 166 науқас жан сақтау бөлімінде жатса, 64-нің жағдайы ауыр халде»-дейді Б.Позилов.
Қазір қалада коронавирус инфекциясына шалдыққан науқастарды емдеуге арналған үш мыңға жуық төсек-орын бар. Эпидемиялогиялық жағдай өршуіне байланысты инфекциялық төсек орындар саны күннен-күнге көбейтілуде. Жалпы жыл басынан бері ковид жұқтырған 13 109 науқас тіркелген.
