Ана тілі – әр халықтың ғасырлар бойы қалыптасқан рухани қазынасы, ұлттық болмысы мен тарихи жадын сақтайтын баға жетпес құндылық. Тіл арқылы ұлттың дүниетанымы, салт-дәстүрі, әдет-ғұрпы мен мәдениеті ұрпақтан-ұрпаққа жалғасып отырады. Сондықтан ана тілін ардақтау – елдікті, ұлттық құндылықтарды құрметтеудің айқын көрінісі.
Қазақ халқы үшін ана тілінің орны ерекше. Қазақ тілі – халқымыздың талай ғасырлық тарихын бойына жинаған, сөздік қоры бай, көркем әрі мағыналы тіл. Ұлы Абайдың ой-толғамдары, Жамбылдың жырлары, Мұхтар Әуезовтің шығармалары мен Мағжанның сырлы өлеңдері – ана тіліміздің құдіретін танытатын асыл мұралар.
Мемлекеттік тілдің қолданыс аясын кеңейту – тек мемлекеттік органдардың немесе жекелеген мекемелердің міндеті емес, барша қоғамға ортақ жауапкершілік. Тілді дамыту оның күнделікті өмірде, білім мен ғылымда, мәдениетте, бұқаралық ақпарат құралдарында және мемлекеттік қызмет көрсету саласында кеңінен қолданылуынан басталады.
Сот жүйесінде де мемлекеттік тілдің маңызы зор. Сот төрелігін жүзеге асыру барысында азаматтардың құқықтары мен заңды мүдделерін қорғау, сот процесіне қатысушыларға өз құқықтары мен міндеттерін түсіндіру кезінде тілдің анық әрі түсінікті қолданылуы – заң үстемдігінің маңызды талаптарының бірі.
Қазақстан Республикасының заңнамасына сәйкес, сот ісін жүргізу мемлекеттік тілде жүзеге асырылады, ал қажет болған жағдайда сот ісін жүргізуде басқа тілдер де заңда белгіленген тәртіппен қолданылады. Бұл – азаматтардың сот төрелігіне еркін қол жеткізуіне, өз ойын түсінікті жеткізуіне және құқықтарын толыққанды қорғауына мүмкіндік беретін маңызды қағида.
Ана тілін құрметтеу – оны тек білу емес, оны күнделікті қарым-қатынаста орынды әрі сауатты қолдану. Әрбір мемлекеттік қызметші өз саласында мемлекеттік тілдің мәртебесін көтеруге үлес қоса алады. Іс қағаздарын сауатты жүргізу, азаматтармен қазақ тілінде еркін сөйлесу, ресми құжаттарды тіл нормаларына сай рәсімдеу – осы бағыттағы нақты қадамдардың бірі.
Тіл тағдыры – ұлт тағдыры. Ана тіліміздің болашағы бүгінгі ұрпақтың тілге деген құрметі мен жауапкершілігіне байланысты. Тілімізді сақтау үшін оны тек мерекелік шараларда дәріптеп қана қоймай, күнделікті өміріміздің табиғи бөлшегіне айналдыруымыз қажет.
Әр қазақ үшін ана тілі – жүректің үні, ұлттың рухы, атадан балаға аманат болған асыл мұра. Сол аманатты көздің қарашығындай сақтау, қадірін арттыру және келер ұрпаққа кемел күйінде жеткізу – баршамыздың ортақ парызымыз.
А.БЕКЖАНОВА,
Шымкент қаласының қылмыстық істер жөніндегі
мамандандырылған ауданаралық соты әкімшісі
басшысының орынбасары.
