Ана тілі – ұлттың рухани өзегі, халықтың ғасырлар бойы қалыптасқан болмысын, тарихы мен мәдениетін сақтайтын баға жетпес құндылық. Тіл – тек қарым-қатынас құралы ғана емес, елдің бірлігін бекемдейтін, ұрпақ сабақтастығын жалғайтын қуатты күш. Сондықтан мемлекеттік тілді дамыту мен оның қоғамдық қолданыс аясын кеңейту – баршамызға ортақ міндет.
Қазақ тілі – халқымыздың ұлттық қазынасы. Оның мәртебесін көтеру, күнделікті өмірде кеңінен қолданылуына жағдай жасау тек мемлекеттік мекемелердің немесе тіл мамандарының ғана жұмысы емес. Бұл – әрбір азаматтың ел алдындағы жауапкершілігі.
Тілді өркендету ең алдымен оны құрметтеуден басталады. Ана тілінде сөйлеу, сауатты жазу, мемлекеттік тілдегі ақпаратты тұтыну, қызметтік ортада қазақ тілін кеңінен қолдану – тілге деген жанашырлықтың нақты көрінісі. Әсіресе мемлекеттік қызметшілер үшін бұл бағыттағы жауапкершіліктің жүгі айрықша.
Сот жүйесінде мемлекеттік тілдің қолданыс аясын кеңейтуге де ерекше мән беріледі. Құқық саласында тілдің сауатты әрі дұрыс қолданылуы азаматтардың заң нормаларын түсінуіне, сот төрелігіне деген сенімінің артуына ықпал етеді. Сот құжаттарының, ақпараттық материалдардың және халықпен жүргізілетін түсіндіру жұмыстарының мемлекеттік тілде сапалы жүзеге асырылуы – осы бағыттағы маңызды міндеттердің бірі.
Қазақ тілінің заң саласындағы қолданысын дамыту үшін терминдердің бірізділігіне, құқықтық мәтіндердің түсінікті әрі сауатты жазылуына назар аударудың маңызы зор. Өйткені заң тілі баршаға түсінікті болған кезде ғана құқықтық сауаттылық та арта түседі.
Бүгінде мемлекеттік тілді дамытуға барлық жағдай жасалып келеді. Дегенмен тілдің шынайы беделі заңмен немесе талаппен ғана емес, оны қоғам мүшелерінің күнделікті өмірде қолдануымен қалыптасады. Тілдің болашағы туралы айтқанда, әрқайсымыз өз үлесімізді қоса алатынымызды ұмытпауымыз керек.
«Тіл тағдыры – ел тағдыры» деген сөз бекер айтылмаған. Тілді сақтау – өткенге құрмет болса, оны дамыту – келешекке жасалған қамқорлық. Сондықтан мемлекеттік тілдің мәртебесін биіктетуге, оның қолданыс аясын кеңейтуге әрбір азамат өз ісімен үлес қосқаны абзал.
Ұлттың рухын көтеретін, елдің еңсесін биіктететін ана тіліміздің абыройы асқақ болсын десек, оған деген құрметті сөзбен емес, күнделікті әрекетімізбен көрсетейік. Себебі тілді өркендету – жекелеген адамдардың емес, баршаның ісі.
А.БЕКЖАНОВА,
Шымкент қаласының қылмыстық істер жөніндегі мамандандырылған ауданаралық соты әкімшісі басшысының орынбасары.
