4 маусым – Қазақстан Республикасының Мемлекеттік рәміздері күніне орай Сауран ауданында ауқымды патриоттық іс-шара ұйымдастырылды. Түркістан облысы бойынша бір мезетте өткен таңғы жаттығуға аудан тұрғындары, спортшылар, жастар және дене шынықтыру саласының өкілдері қатысып, жалпы саны 500 адам қамтылды.
Іс-шараның мақсаты – мемлекеттік рәміздерді ұлықтау, бұқаралық спортты дамыту, салауатты өмір салтын насихаттау және жастардың бойында отансүйгіштік қасиеттерді қалыптастыру.
Таңғы жаттығуды әйелдер күресінен халықаралық дәрежедегі спорт шебері, Сербия мемлекетінде өткен 23 жасқа дейінгі спортшылар арасындағы әлем чемпионатының жеңімпазы, сондай-ақ 23 жасқа дейінгі спортшылар арасындағы Азия чемпионатының жеңімпазы Шұғыла Өмірбек жүргізді. Белгілі спортшы қатысушыларға арнайы жаттығу жасатып, бұқаралық спортпен тұрақты айналысудың маңыздылығын түсіндірді.
Белгіленген уақытқа сәйкес қатысушылар бір мезетте жаттығуды бастап, патриоттық іс-шараға жоғары белсенділік танытты. Жаттығу соңында Қазақстан Республикасының Мемлекеттік Әнұраны орындалып, барлық қатысушылар «Мемлекеттік рәміздер ұлттық мақтаныштың белгісі» ұранын бірге айтты.
Аталған іс-шара мемлекеттік рәміздерге деген құрметті арттыруға, тұрғындар арасында салауатты өмір салтын қалыптастыруға және қоғамдағы бірлік пен патриоттық рухты нығайтуға бағытталды.
Айта кетейік, бұл бастама Түркістан облысының барлық аудан-қалаларында бір уақытта ұйымдастырылып, Мемлекеттік рәміздер күніне арналған өңірлік патриоттық акция аясында өткізілді.
