Қазіргі кезеңде мемлекеттік қызметтерді цифрландыру сот жүйесінің тиімділігін арттырудың маңызды бағыты болып табылады. Осы мақсатта енгізілген «Сот кабинеті» сервисі азаматтар мен заңды тұлғаларға сот органдарымен электрондық форматта өзара іс-қимыл жасауға мүмкіндік береді.
«Сот кабинеті» арқылы талап қою арыздарын, өтінішхаттарды және өзге де процестік құжаттарды жолдауға, сот істерінің қаралу барысын бақылауға, сот актілерін алуға болады. Сонымен қатар, азаматтар мен ұйымдар сот органдарына «е-Өтініш» ақпараттық жүйесі арқылы өтініштер жолдап, олардың қаралу нәтижелері туралы ақпаратты онлайн режимде ала алады.
Аталған электрондық сервистер сот төрелігінің қолжетімділігін қамтамасыз етіп, құжат айналымын оңтайландыруға, уақыт шығындарын азайтуға және мемлекеттік қызметтердің ашықтығын арттыруға ықпал етеді.
Қорытындылай келе, «Сот кабинеті» мен «е-Өтініш» жүйелері сот саласын цифрландырудың маңызды құралдары болып табылады. Оларды тиімді пайдалану азаматтардың құқықтарын қорғауға және мемлекеттік қызмет көрсету сапасын арттыруға мүмкіндік береді.
Жавлан МИРЗАЕВ,
Шымкент гарнизоны әскери сотының жетекші маманы.
