Шымкент қаласының Дін істері басқармасының ұйымдастыруымен жоғары оқу орындарының студенттері арасында діни экстремизм мен терроризм идеологиясының алдын алу, жастардың діни сауаттылығын арттыру және сыни ойлау мәдениетін қалыптастыру мақсатында өткізілген «Жастар алаңы» интеллектуалды сайысының іріктеу кезеңі өз мәресіне жетті.
https://www.facebook.com/reel/1742671466905153
Іріктеу кезеңіне Шымкент қаласындағы жоғары оқу орындарының атынан 18 команда қатысып, өзара білім мен интеллект сайысында бақ сынады. Қатысушылар ұлттық құндылықтар, зайырлы мемлекет қағидаттары, дін және қоғам, ақпараттық қауіпсіздік, сыни ойлау, діни экстремизм мен терроризмнің алдын алу бағыттары бойынша білімдерін көрсетті.
Сайыс барысында студенттер логикалық тапсырмаларды орындап, күрделі сұрақтарға жауап беріп, өздерінің тапқырлығы мен командада жұмыс істеу қабілеттерін дәлелдеді. Әр команда жоғары дайындық деңгейін көрсетіп, тартысты бәсеке қалыптастырды.
Қазылар алқасының шешімімен үздік нәтиже көрсеткен 8 команда келесі кезеңге өтіп, телевизиялық форматта түсірілетін негізгі ойынға жолдама алды.
Телевизиялық кезеңге өткен командалар:
— «Арқас» командасы – Ө. Жәнібеков атындағы Оңтүстік Қазақстан педагогикалық университеті;
— «Мстители» командасы – М. Әуезов атындағы Оңтүстік Қазақстан зерттеу университеті;
— «Алаш» командасы – Ө. Жәнібеков атындағы Оңтүстік Қазақстан педагогикалық университеті;
— «Алмас қылыш» командасы – М. Әуезов атындағы Оңтүстік Қазақстан университеті;
— «Жасын» командасы – Ө. Жәнібеков атындағы Оңтүстік Қазақстан педагогикалық университеті;
— «V4» командасы – М. Әуезов атындағы Оңтүстік Қазақстан университеті;
— «Марс жастары» командасы – Орта Азия Инновациялық университеті;
— «Med IQ» командасы – Оңтүстік Қазақстан медицина академиясы.
Алдағы телевизиялық ойын барысында командаларды жаңа форматтағы интеллектуалдық бәсеке, блиц-сұрақтар, логикалық тапсырмалар, пікірталас кезеңдері және көрермендерге арналған қызықты форматтағы сындар күтеді.
«Жастар алаңы» жобасы – жастардың білімін шыңдап қана қоймай, олардың азаматтық жауапкершілігін арттыруға, діни экстремизм мен терроризм идеологияларына қарсы берік иммунитет қалыптастыруға бағытталған маңызды қоғамдық жоба. Осындай алаңдар арқылы жастардың сыни ойлау қабілеті дамып, қоғамдағы тұрақтылық пен келісімді нығайтуға үлес қосатын белсенді азаматтар қалыптасады.
Шымкент қаласының Дін істері басқармасы барлық қатысушыларға белсенділігі мен жоғары дайындық деңгейі үшін алғыс білдіреді. Телевизиялық кезеңге жолдама алған командаларды құттықтай отырып, алдағы шешуші кезеңде сәттілік пен жарқын жеңістер тілейміз!
Білімді жастар – қауіпсіз қоғамның кепілі!
