Биыл адамзат тарихындағы ең қасіретті кезеңдердің бірі – Ұлы Отан соғысындағы Жеңіске 81 жыл толып отыр. Бұл күн – ерлік пен елдіктің, отансүйгіштік пен батырлықтың символына айналған ерекше тарихи мереке.
Ұлы Жеңіс күні – майдан даласында жанын қиған боздақтарды еске алып, ардагерлерге құрмет көрсететін тағылымы мол мереке. Қазақ халқы қашанда ерлік пен батырлықты қастерлеген. Сондықтан Жеңіс күні – ұлт тарихындағы ең қастерлі күндердің бірі.
Соғыс жылдары халқымыз тылда да, майданда да өлшеусіз еңбек пен қайсарлықтың үлгісін көрсетті. Бейбіт өмір мен болашақ ұрпақтың тыныштығы үшін қаншама жауынгер Отан жолында жанын құрбан етті. Олардың ерлігі мен есімі халық жадында мәңгі сақталады.
Бүгінде Жеңіс мерекесі өскелең ұрпаққа патриоттық тәрбие берудің маңызды құралына айналып отыр. Ардагерлердің өнегелі өмір жолы жастарды елін, жерін сүюге, Отан алдындағы жауапкершілікті сезінуге тәрбиелейді.
Мемлекет басшысы айқындаған «Заң мен тәртіп» қағидаты аясында қоғамдағы тұрақтылық пен бірлікті сақтау – баршамызға ортақ міндет. Ел тыныштығы мен қоғам қауіпсіздігі – ата-бабалардың жанқияр ерлігінің арқасында келген баға жетпес құндылық. Сондықтан бейбіт өмірдің қадірін түсініп, заң мен тәртіпті сақтау әр азаматтың парызы болып қала береді.
Ұлы Жеңіс – тек өткеннің тарихы емес, ол – болашақ ұрпаққа аманат. Батырлар ерлігі ешқашан ұмытылмайды, ал олардың Отанға деген адалдығы кейінгі буынға әрдайым үлгі болып қала береді.
А.СЕРІКБАЕВ,
Шымкент гарнизоны әскери соты әкімшісінің басшысы.
