«Белсенді ұзақ өмір және тең қоғам» әлеуметтік қызметтер көрсету орталығында Ұлы Отан соғысындағы Жеңістің 81 жылдығына орай аудан ардагерлері арасында бильярдтан аудандық турнир ұйымдастырылды.
Турнирдің ашылу салтанатына қатысқан аудан әкімі Мұхит Тұрысбеков ардагерлерге ізгі тілегін арнап, сәттілік тіледі. Сонымен қатар, аға буын өкілдерінің ел дамуы жолындағы елеулі еңбектеріне алғыс білдіріп, өмірлік тәжірибесі мен ақыл-кеңесі қашанда маңызды екенін атап өтті.
Жиын барысында бірқатар ардагерлерге Түркістан облысы әкімінің арнайы Алғыс хаты табысталып, «Ерен еңбек иесі» және «Ардақты ардагер» төсбелгілерімен марапатталды. Бұл марапаттар ардагерлердің қоғамдағы еңбегіне көрсетілген ерекше құрметтің белгісі ретінде бағаланды.
Аудан басшысы турнир қатысушыларымен бірге бильярд ойнап, ардагерлермен еркін пікір алмасты. Кездесу барысында ол үлкен буын өкілдерінің белсенді өмір салтын ұстануы жастарға үлгі екенін атап өтіп, мұндай шаралардың алдағы уақытта да жалғасатынын жеткізді.
Өз кезегінде аудандық ардагерлер кеңесінің төрағасы Қабылбек Еспенбетов майдан даласында ерлік көрсеткен ата-бабаларымыздың рухына тағзым ету – кейінгі ұрпақтың қасиетті парызы екенін айтып, жарысқа қатысушыларға ақжарма тілегін жеткізді. Ол ардагерлердің қоғамдағы бірлік пен татулықты нығайтудағы рөлін ерекше атап өтті.
Аталған турнирге аудан аумағындағы ауылдар мен елді мекендерден келген ардагерлер қатысуда. Жарыс екі жас ерекшелігі бойынша өткізілуде. Атап айтқанда, 63–70 жас аралығындағы 15 ардагер І топта, ал 70 жастан асқан 20 қария ІІ топта өзара бақ сынауда.
Бильярд турнирі ардагерлердің тек спорттық белсенділігін арттырып қана қоймай, олардың өзара қарым-қатынасын нығайтуға, бос уақытын тиімді өткізуге және салауатты өмір салтын насихаттауға бағытталған. Мұндай жарыстар үлкен буынның қоғамдағы белсенділігін арттырып, олардың өмірге деген құлшынысын күшейтеді.
Сондай-ақ, бұл бастама жас ұрпаққа да өнеге болып, ардагерлердің өмірлік тәжірибесін құрметтеуге тәрбиелейді. Қатысушылар арасында достық пен сыйластық атмосферасы қалыптасып, жарыс жоғары деңгейде өтуде.
Турнир соңында жеңімпаздар мен белсенді қатысушылар арнайы марапаттарға ие болады деп күтілуде. Мұндай игі шаралар алдағы уақытта да жалғасын тауып, ардагерлерге деген құрметті арттыра бермек.
