Өңір кәсіпкерлері мен бизнеске қызығушылық танытқан азаматтар үшін Кәсіпкерлер палатасында «Отбасылық бизнес: 7 психотип негізінде басқару өнері» тақырыбында онлайн семинар өткізілді.
Іс-шараның басты мақсаты – кәсіпкерлерге заманауи басқару тәсілдерін үйрету және командалық жұмыс дағдыларын дамыту.
Семинарға өңірдегі кәсіпкерлер, жас бизнес өкілдері және кәсіпкерлікке жаңа қадам басуды жоспарлаған азаматтар онлайн форматта Zoom қосымшасы арқылы қатысты.
Семинар спикері – MBA дәрежесінің иегері, FranklinCovey халықаралық компаниясының фасилитаторы, ALMAU университетінің Оңтүстік аймағы бойынша төрайымы Акнур Джамалбекова. Ол қазіргі бизнесте табысқа жету үшін тек кәсіби білімнің жеткіліксіз екенін атап өтті.
«Бүгінгі таңда тиімді басшы болу үшін адамдармен дұрыс қарым-қатынас орнату, олардың психологиялық ерекшеліктерін түсіну маңызды. Команда мүшелерінің мінез-құлқын ескере отырып басқару – бизнестің тұрақты дамуына жол ашады», – деді ол.
Семинарда отбасылық бизнестегі басқару мәдениеті, команда құру принциптері және 7 психотипке негізделген басқару тәсілдері кеңінен талқыланды. Акнур Джамалбекова әр психотиптің ерекшеліктерін нақты мысалдар арқылы түсіндіріп, оларды командамен жұмыс істеуде, қызметкерлерді ынталандыруда және бизнес үдерістерін тиімді ұйымдастыруда қолданудың жолдарын көрсетті.
Сонымен қатар FranklinCovey халықаралық тәжірибесіне негізделген басқару құралдары таныстырылып, қатысушылар практикалық мысалдар арқылы тиімді басқару әдістерімен танысты.
«Мұндай семинарлар кәсіпкерлерге бизнесті тиімді басқару мен командалық жұмысты дұрыс ұйымдастырудың заманауи тәсілдерін меңгеруге мүмкіндік береді. Бұл отбасылық және шағын бизнестің тұрақты дамуына оң ықпал етеді», – деді Кәсіпкерлер палатасының шағын кәсіпкерлікті дамыту бөлімінің сарапшысы Азат Айдарбекұлы.
Семинар соңында кәсіпкерлер өздерін толғандырған сұрақтарына жауап алып, нақты бизнес жағдайларына байланысты кәсіби кеңестер алды.
Мамандардың пікірінше, мұндай семинарлар өңір кәсіпкерлерінің кәсіби деңгейін арттырып қана қоймай, отбасылық бизнестің жүйелі дамуына және кәсіпкерлік мәдениеттің қалыптасуына елеулі ықпал етеді.
