Жол құрылысына қажетті битум өндірісі – инфрақұрылым саласының маңызды бағыттарының бірі. Осы бағытта жұмыс істейтін Шымкент қаласындағы «Qazaq Bitum» өндіріс орнына Түркістан облысы Кәсіпкерлер палатасының директоры Асылан Ибадуллаев арнайы барып, кәсіпорынның қызметімен танысты.
Кездесу барысында кәсіпорынның өндірістік процесі, өнім шығару көлемі және логистикалық мүмкіндіктері талқыланды. Qazaq Bitum – елімізде жол құрылысына қажетті битум өндіретін және оны көтерме түрде жеткізумен айналысатын компаниялардың бірі. Кәсіпорын жол битумын, полимерлі-битумды тұтқыр материалдарды (БМП 50/70) және битум эмульсияларын өндіреді. Сондай-ақ компания битумды жеткізу қызметін де ұсынады. Өнім теміржол және автокөлік арқылы жыл мезгіліне және қашықтыққа қарамастан жеткізіледі.
Өндіріс орнын аралау барысында Асылан Ибадуллаев кәсіпкерлермен ашық әңгімелесіп, олардың жұмысына қатысты мәселелер мен ұсыныстарды тыңдады. Палата директоры кәсіпкерлердің өндірісті дамытуына қолдау көрсету маңызды екенін атап өтіп, қандай да бір қиындықтар немесе жүйелі мәселелер туындаса, оны тікелей жеткізуге болатынын айтты.
«Түркістан облысы Кәсіпкерлер палатасы әрдайым кәсіпкерлердің жанынан табылып, бизнесті дамытуға бағытталған бастамаларға қолдау көрсетуге дайын. Егер өндіріс барысында кедергілер немесе әкімшілік мәселелер туындаса, Палата тарапынан тиісті көмек көрсетуге әрқашан әзірміз», – деді Асылан Ибадуллаев.
