ҚР Орталық Референдум Комиссиясының төрағасының орынбасары Мұхтар Ерман 2026 жылғы 15 наурызға тағайындалған республикалық референдумды дайындау және өткізу мәселелері бойынша Түркістан облысының мемлекеттік органдары өкілдерімен және аудан-қалалық аумақтық референдум комиссиясы төрағаларымен кеңес өткізді.
Жиынға Түркістан облысы әкімі аппаратының басшысы Еркебұлан Дауылбаев, Түркістан облысы прокурорының орынбасары Дәулет Тлемисов, Түркістан облысы Полиция департаменті бастығының орынбасары Бағланбек Айтпаев, Түркістан облысы Төтенше жағдайлар департаменті бастығының бірінші орынбасары Асқар Сейсенов, Түркістан облысы жұмыспен қамтуды үйлестіру және әлеуметтік бағдарламалар басқармасының басшысы Мекенхан Қозыханұлы және облыстық, қалалық, аудандық аумақтық референдум комиссия төрағалары мен мүшелері қатысты.
Жиында сөз алған Түркістан облысы әкімі аппаратының басшысы Еркебұлан Дауылбаев облыс аумағында референдумге дайындық жұмыстары жүйелі түрде жүргізіліп жатқанын атап өтті.
“Референдум өткізуге 1 — облыстық, 17 — қалалық, аудандық аумақтық және 948 учаскелік референдум комиссиялары қатысатын болады. Облыстағы 948 референдум учаскелерінде материалдық-техникалық қамтамасыз ету мәселесі толығымен шешілген. Барлық учаскелер жиһазбен, ұйымдастыру техникасымен, байланыс құралдарымен жабдықталған, интернетпен, дауыс беруге арналған кабиналармен, урналармен қамтамасыз етілген. Референдум учаскелеріне бюллетеньдерді жеткізу, күзету, дауыс беру күні қоғамдық қауіпсіздікті қамтамасыз ету, өрт қауіпсіздігі және сайлаушыларды тасымалдау мәселелері пысықталды” деді өз баяндамасында.
Түркістан облыстық аумақтық референдум комиссиясының төрағасы Аңсар Өсербаев референдумға дайындық барысының ұйымдастырылуы туралы баяндады.
Өз кезегінде ҚР Орталық Референдум Комиссиясының төрағасының орынбасары Мұхтар Тілдәбекұлы жиынға қатысушыларға референдумды ұйымдастыру және өткізу жұмыстары туралы баяндады.
“Әрқайсыларыңыз алдағы саяси науқанның маңыздылығын жақсы түсінесіздер. Әсіресе, дауыс беру күні азаматтармен тікелей жұмыс жүргізетін референдум комиссияларының мүшелері өздерінің барлық әрекеттерін қатаң түрде Қазақстан Республикасының заңдарының негізінде жүргізуі тиіс.
Біздің басты міндетіміз – дауыс беруді заңнамаға сәйкес өткізу, электораттық науқанның барлық кезеңдерінде жариялылық пен ашықтықты, қоғамдық және өзге де қауіпсіздікті қамтамасыз ету” деп түйіндеді.
Атап өтейік, Түркістан облысында референдумды ұйымдастыру мен өткізуге барлығы 966 референдум комиссиясы жұмылдырылды: оның ішінде 18 аумақтық, 948 учаскелік жұмыс істейді.
Түркістан облысының жалпы халық саны 2 млн 154 мың адамды құраса, оның ішінде дауыс беру құқығына ие азаматтар саны – 1 187 257, бұл өңір халқының 55,4 пайызына тең.
