Түркістан қаласында Конституциялық реформаны қолдау мақсатында ауқымды әрі мазмұнды іс-шара өтті. Қаланың басты туристік орталықтарының бірі – Керуен сарай кешені аумағындағы тұрғын үйдің қасбетіне кәсіпкерлердің жеке қаражаты есебінен арнайы Конституциялық мурал салынды.
Оқи отырыңыз...
Жаңа мурал – еліміздегі саяси жаңғыру үдерістерінің, әділетті қоғам құру жолындағы батыл қадамдардың көркем бейнесі. Онда Конституциялық реформаның мәні, халық еркі мен бірлігінің маңызы, заң үстемдігі мен азаматтық жауапкершілік идеялары заманауи көркемдік тәсілдер арқылы айшықталған.
Бұл бастама –азаматтық қоғам мен кәсіпкерлік қауымдастықтың белсенді атсалысуымен жүзеге асқан игі іс. Кәсіпкерлердің әлеуметтік жауапкершілігі мен ел болашағына деген жанашырлығының нақты көрінісі ретінде бұл жоба қоғам тарапынан жоғары бағаланды.
Муралдың ашылуына орай жастар өкілдерінің қатысуымен арнайы флешмоб ұйымдастырылды. Іс-шара барысында қатысушылар Конституциялық реформаны қолдайтын ұрандар айтып, көк аспанға референдум тақырыбындағы әуе шарларын ұшырды. Бұл символикалық әрекет – елдің жарқын болашағына деген сенім мен ортақ жауапкершіліктің белгісі болды.
Шара аясында жастар реформаның маңыздылығы, оның мемлекет дамуына ықпалы туралы пікірлерін білдіріп, Конституция – ел бірлігінің, тұрақтылық пен әділеттіліктің берік негізі екенін атап өтті. Ашық аспан астында өткен бұл патриоттық акция қатысушыларға ерекше рух сыйлап, көпшіліктің есінде ұзақ сақталатын тағылымды сәтке айналды.
Жаңа мурал туристік нысандарға тың серпін беріп, қаланың көркем келбетін одан әрі айшықтай түсті. Бүгінде тұрғын үйдің қасбетіндегі Конституциялық мурал жастардың сүйікті фото-аймағына айналып үлгерді. Бұл – өнер арқылы қоғамдық құндылықтарды насихаттаудың тиімді үлгісі.
Аталған жоба – Конституциялық реформаның мәні мен маңызын халыққа кеңінен түсіндіруге бағытталған креативті әрі мазмұнды бастамалардың бірі. Түркістан қаласында жүзеге асқан бұл игі іс – ел болашағына бейжай қарамайтын азаматтардың ортақ ұмтылысының айқын көрінісі.
Түркістан облыстық Жалпыұлттық коалиция
