Түркістан облысы кәсіпкерлер палатасында Өңдеу өнеркәсібі салалық кеңесі мен Сауда және қызмет көрсету жөніндегі салалық кеңестің бірлескен отырысы аясында қоғамдық тамақтану саласындағы қауіпсіздікті арттыруға арналған маңызды ақпараттық семинар ұйымдастырылды. Іс-шараға сала кәсіпкерлері мен жауапты мамандар қатысып, санитариялық талаптарды сақтау және тағам өнімдерінің қауіпсіздігін қамтамасыз ету мәселелерін жан-жақты талқылады.
Семинар барысында мамандар тағамдарды сақтау, өңдеу және өткізу кезіндегі негізгі қателіктерге тоқталып, олардың салдарын түсіндірді. Әсіресе, арнайы назар ботулизмнің алдын алу шаралары мен тамақтан уланудың ықтимал қауіптеріне аударылды.
Кәсіпкерлерге өндірістік бақылау бағдарламасын әзірлеу және санитариялық нормаларды сақтау тәртібі бойынша нақты нұсқаулар берілді. Сонымен қатар жиынға қатысушылар тәжірибе бөлісіп, өздерін толғандырған сұрақтарға жауап алды.
Мұндай ақпараттық іс-шаралар қоғамдық тамақтану саласында қауіпсіздік мәдениетін қалыптастыруға, санитариялық талаптардың сақталуын күшейтуге және кәсіпкерлердің құқықтық сауаттылығын арттыруға маңызды үлес қосады.
