2026 жылдың 02–06 ақпан аралығында Шымкент қаласында М.Әуезов атындағы Оңтүстік Қазақстан университетімен бірлесіп, жеміс шаруашылығы саласының мамандарына арналған ғылыми-практикалық семинар ұйымдастырылуда.
Семинардың негізгі мақсаты – жеміс ағаштарының өнімділігін арттыру, агротехникалық тұрғыда дұрыс кесу әдістерін үйрету арқылы ағаштың өміршеңдігін ұзарту және заманауи жеміс шаруашылығы тәжірибесін кеңінен тарату.
Семинар бағдарламасы аясында қатысушылар:
• жеміс ағаштарын дұрыс кесу және қалыптастыру әдістерін;
• өнімділікті арттырудың заманауи тәсілдерін;
• санитарлық және қалыптастырушы кесу қағидаларын;
• аурулар мен зиянкестердің алдын алу жолдарын меңгереді.
«Қазіргі таңда жеміс шаруашылығын дамытуда тәжірибеге негізделген ғылымның рөлі ерекше. Ағашты дұрыс қалыптастыру, санитарлық кесуді уақтылы жүргізу және аурулардың алдын алу – өнім сапасы мен көлеміне тікелей әсер етеді. Бұл семинар – теория мен далалық тәжірибені ұштастыра отырып, мамандарға нақты әрі қолданбалы білім беретін маңызды алаң», – деді ҚР Ұлттық аграрлық ғылымдар академиясының корреспондент-мүшесі, ҚР Ұлттық аграрлық ғылым академиясының «Яссауи» орталығының жетекшісі, ҚазҰАИУ профессоры, ҚР ҰҒА құрметті академигі, агроконсультациялық орталықтың басшысы Нұрлыбек Боранбаев.
Сонымен қатар теориялық білім далалық тәжірибемен ұштастырылып, практикалық жұмыстар жүргізіледі.
Семинарға отандық және шетелдік ғалымдар, сондай-ақ көпжылдық тәжірибесі бар сала мамандары қатысып, өз білімдері мен тәжірибелерімен бөлісуде.
«Жеміс ағаштарын ғылыми негізде кесу – жоғары өнім мен ұзақ мерзімді тұрақты бақ шаруашылығының басты кепілі. Бұл семинар мамандарға нақты тәжірибеге сүйенген білім беруге бағытталған», – деді Агроөнеркәсіптік кешенді дамыту бөлімінің басшысы Ерлан Сатанбаев.
Аталған іс-шара жеміс шаруашылығы саласындағы мамандардың кәсіби біліктілігін арттыруға және өңірде заманауи агротехнологияларды енгізуге серпін береді.
