Елордасы – Астанада Қазақстан Республикасының «Атамекен» Ұлттық кәсіпкерлер палатасының XIII съезі өтті
Съезде палатаның 2024-2025 жылдарға арналған жұмысы қорытындыланып, негізгі институционалдық және қаржылық мәселелер талқыланып, кәсіпкерлікті одан әрі дамытудың басым бағыттары белгіленді.
Съезге Үкімет, Парламент, даму институттары, құқық қорғау органдары, еліміздің барлық өңірлерінен бизнес-қауымдастық өкілдері, Түркістан облысы кәсіпкерлер палатасы жанындағы Өңірлік кеңес төрағасы, облыстық мәслихат төрағасы Нұралы Әбішов, өңірлік кеңес мүшесі, облыстық мәслихат депутаты Инара Намазбаева, Түркістан облысы кәсіпкерлер палатасының директоры Асылан Ибадуллаев, съез делегаттары, сондай-ақ өңірлік кеңес мүшелері қатысты.
Жиында ҚР Премьер-министрінің бірінші орынбасары Роман Скляр Премьер-министр Олжас Бектеновтың құттықтау хатын оқыды. «Атамекен» ҰКП Төралқа Төрағасы Райымбек Баталов сөз сөйлеп, шағын және орта бизнестің, жобаларға толық қолдау көрсетудің, цифрлық технологияларды енгізудің маңыздылығына тоқталды.
Негізгі мәселелердің бірі «Атамекен» ҰКП-ның 2024-2025 жылдардағы қызметі туралы жыл сайынғы есепті бекіту болды. «Атамекен» ҰКП Басқарма мүшесі — Басқарма Төрағасының орынбасары Нұрсұлтан Шоқанов баяндама жасады. «Атамекен» ҰКП миссиясы – бизнес пен мемлекеттің тиімді диалогы арқылы кәсіпкерлікті тұрақты дамыту екендігі атап өтілді.
Съезде Палатаның Жарғысына және Төралқа құрамына өзгерістер мен толықтыруларды бекітті. Көпшілік дауыспен «Атамекен» ҰКП Төралқасының Төрағасы және Басқарма Төрағасы болып Қанат Шарлапаев сайланды. Қанат Бисимбайұлы палатаның бизнес пен мемлекет арасындағы диалог институты ретіндегі рөлін нығайтуға басымдық берілетінін мәлімдеді.
