Түркістанда сыбайлас жемқорлық тәуекелдерін азайту мәселелері тұрақты бақылауда ұсталады. Осы бағытта облыс әкімдігі жанындағы Сыбайлас жемқорлыққа қарсы іс-қимыл мәселелері жөніндегі комиссияның кезекті отырысы өткізілді. Облыс әкімі Нұралхан Көшеровтің төрағалығымен өткен жиын барысында өңірде сыбайлас жемқорлық тәуекелдерін анықтау, алдын алу және тиісті шараларды жүзеге асыру жолдары қаралды.
Денсаулық сақтау, білім беру, әлеуметтік қорғау, ауыл шаруашылығы, құрылыс, жол және тұрғын үй-коммуналдық шаруашылық. Бұл – халық күн сайын бетпе-бет келетін салалар. Демек, бұл салалардағы кез келген заңсыздық немесе ашықтықтың болмауы қарапайым тұрғынның өмір сапасына тікелей әсер етеді. Комиссия отырысында жауапты басқарма басшылары атқарылған жұмыстарды баяндады.
Түркістан облысы кәсіпкерлер палатасының директоры Асылан Ибадуллаев сыбайлас жемқорлық тәуекелдері ең алдымен адал кәсіпкерге кедергі келтіретінін атап өтті.
Жиын соңында облыс әкімі Нұралхан Көшеров жауапты басқарма басшыларына сыбайлас жемқорлық тәуекелдерін азайту үшін нақты тапсырмалар беріп, алдын алу шараларын жүйелі түрде күшейтуді тапсырды.
