Кентау қаласында қала әкімдігі, қалалық прокуратура, Түркістан облысы кәсіпкерлер палатасы, ауыл әкімдері, бөлім және мекеме басшылары мен жергілікті кәсіпкерлердің қатысуымен кеңейтілген жиын өтті.
Кездесуде қала әкімі Жандос Тасов кәсіпкерлік саласындағы өзекті мәселелерді ашық талқылап, бизнеске қолдау көрсетудің маңызын атап өтті. Кәсіпкерлер инфрақұрылым тарту, жер телімдерін рәсімдеу, рұқсат құжаттарының қолжетімділігі, бақылау процесстерін жеңілдету, шағын бизнесті ұлғайту және төмен пайызды мемлекеттік несиелерге қол жеткізу мәселелерін көтерді.
Кентау қалалық филиал директоры Мұрат Садуов өз сөзінде:
«Біздің басты мақсат – кәсіпкерлердің жұмысына кедергі келтіретін мәселелерді жедел шешу. Әр ұсыныс мұқият қаралып, кәсіпкерліктің дамуына нақты жағдай жасаймыз», – деді.
Жиында прокуратура және Палата өкілдері түсіндіру жұмыстарын жүргізіп, бизнес құқықтарын қорғау, заң талаптарының бірізді сақталуы және әкімшілік қысымды азайту бойынша кеңес берді.
Кездесу қорытындысында қала басшысы жауапты бөлімдерге нақты тапсырмалар жүктеп, әр мәселе бойынша мерзім белгіледі. Ол сондай-ақ:
«Кәсіпкерлермен диалог тұрақты түрде жалғасады. Біз үшін олардың әрқайсының ұсынысы құнды», – деп атап өтті.
Кентауда бизнес климатын жақсарту бағытындағы жұмыстар алдағы уақытта да жүйелі түрде жүргізілмек.
