Бүгін Түркістанда адвокаттар қауымдастығының өкілдерінің қатысуымен «Бизнесті қорғау» жобасы аясында кәсіпкерлік субъектілерінің проблемалық мәселелерін қарау жөніндегі отырыс өтті.
Іс-шараның мақсаты – қылмыстық процесс аясында бизнес субъектілерінің құқықтарын қорғау, сондай-ақ кәсіпкерлік қызметті жүзеге асыру барысында туындайтын әкімшілік кедергілерді азайту мәселелерін талқылау.
Жиынның жұмысына Түркістан облысының прокуратурасы, Экономикалық тергеп-тексеру департаменті, Полиция департаменті, сондай-ақ Түркістан облысы және Шымкент қаласы Адвокаттар алқаларының өкілдері қатысты.
Офлайн форматта Түркістан облысының прокуратурасы Сотқа дейінгі тергеп-тексерудің заңдылығын қадағалау және қылмыстық қудалау басқармасының аға прокуроры Нұржан Мырзакерім және осы басқарманың прокуроры Ғалымжан Есен, сондай-ақ Түркістан облысы Полиция департаменті Қоғамдық қауіпсіздік басқармасының басшысы Ермек Өсербаев пен Экономикалық тергеп-тексеру департаментінің Ұйымдастыру-бақылау басқармасының басшысы Халымжан Маматаев, ал онлайн форматта Шымкент қаласы Адвокаттар алқасының қорғаушылары қатысты.
Кездесу барысында кәсіпкерлердің құқықтарын қорғау саласындағы өзекті мәселелер, құқық қорғау және бақылаушы органдармен өзара іс-қимылды жетілдіру шаралары жан-жақты талқыланды.
Осы орайда Түркістан облысы Кәсіпкерлер палатасы директорының орынбасары Зухра Амирова:
«Біздің мақсат – бизнеске қысым көрсетудің кез келген түрін азайтып, кәсіпкерлердің заңды құқықтарын қорғауды күшейту. Бұл бағыттағы әрбір кездесу нақты шешім қабылдауға және тиімді өзара іс-қимыл орнатуға мүмкіндік береді», – деп атап өтті.
Отырыстың қорытындысы бойынша хаттамалық шешімдер қабылданып, кәсіпкерлердің құқықтарын қорғау және бизнеске әкімшілік қысымды азайту бағытында бірлескен шараларды жалғастыру туралы келісімге келінді.
