20 тамыз күні Түркістан облысы кәсіпкерлер палатасында үшжақты отырыс өтіп, кәсіпкердің мемлекеттік сатып алу шарты бойынша нақты атқарған жұмыстарының актісіне қол қою және төлем жүргізу мәселесі талқыланды.
Отырысты Түркістан облысы кәсіпкерлер палатасы директорының орынбасары Зухра Амирова жүргізді. Кездесуге Палата сарапшылары, «ЖК Онбаев» басшысы Зұлпыхар Онбаев пен өкілдері, сондай-ақ Кентау қаласы білім бөлімінің, «Дәуір» бөбекжай-бақшасының қызметкерлері қатысты.
2024 жылғы 25 мамырда «ЖК Онбаев» пен «Дәуір» бөбекжай-бақшасы арасында «Мемлекеттік сатып алу туралы» ҚР Заңының «Бағалы ұсыныстарға сұраным» тәсілі негізінде №21 келісім-шарт жасалған. Кәсіпкер келісім-шартта көрсетілген жұмыстардың басым бөлігін орындағанымен, тапсырыс беруші тарапынан объектіде жұмысты жалғастыруға мүмкіндік берілмеген. Соның салдарынан кәсіпкер келісімде көзделген жұмысты толық көлемде аяқтай алмаған.
Кездесу барысында Палата екі жақты тыңдап, мәселені шешу жолдарын ұсынды, ол үшін тараптар алдымен атқарған жұмыстын нақты көлемі мен төлемақысын анықтау мақсатында сараптама жүргізуі тиіс. Осы құжат негізінде әрі қарай заң аясында жұмыс жүргізілетін болады. Бұл ұсынысты тараптар қолдады.
Түркістан облысы Кәсіпкерлер палатасы директорының орынбасары Зухра Амирова атап өтті:
«Мұндай жағдайда кәсіпкердің құқығы мен еңбегі қорғалуы тиіс. Егер нақты жұмыстар атқарылса, олар міндетті түрде рәсімделіп, актіге қол қойылып, төлем жүргізілуі қажет. Палата әрқашан бизнес пен мемлекеттік органдар арасындағы даулы жағдайларды заңды жолмен шешуді көздейді».
