Шымкент қаласының Абай ауданында тұрғындардың өмір сапасын жақсартуға бағытталған ауқымды инфрақұрылымдық жобалар кезең-кезеңімен жүзеге асырылуда. Атап айтқанда, аудан аумағында жол-құрылыс жұмыстары, көше жарықтандыруы, жаяу жүргіншілер жолдарын салу, абаттандыру және ирригациялық жүйелерді қайта жаңарту ісі жүйелі түрде жүргізіліп келеді.
Бүгінгі күні, ұзындығы 2,8 шақырымды құрайтын жаяу жүргіншілер жолының құрылысы жүргізілуде. Жоба Уәлиханов көшесінен Желтоқсан көшесіне дейінгі аралықты қамтиды. Құрылыс аясында жаңа брусчатка төселіп, жол жиектері абаттандырылуда. Бұл – тұрғындар мен жаяу жүргіншілер үшін қолайлы әрі қауіпсіз орта қалыптастырудың нақты көрінісі.
Сондай-ақ, Ақназар хан көшесіне дейін жарықтандыру жүйесін тарту қарастырылып, осы мақсатта 310 дана жарық бағанасын орнату көзделіп отыр. Жарықтандыру жобасы түнгі уақыттағы қауіпсіздік деңгейін арттыруға мүмкіндік бермек.
Аудан аумағында орналасқан тұрғын алаптар да назардан тыс қалған жоқ. Абдулабад шағынауданында негізгі көшелердің бірі жаңадан асфальтталып, жол жиектері мен ирригациялық арықтар ретке келтірілуде. Сонымен қатар, дәл осы аумақта балалар ойын алаңы мен шағын спорт алаңының құрылысы қатар жүргізілуде. Мұндай әлеуметтік нысандар тұрғындардың бос уақытын тиімді өткізуге, салауатты өмір салтын қалыптастыруға сеп болары сөзсіз.
Ирригациялық жүйені жаңарту — аудан үшін өзекті мәселелердің бірі. Қазіргі таңда бірнеше көшеде арық-атыз жүйелерін қайта қалпына келтіру жұмыстары жүріп жатыр. Бұл – жаңбыр және ағын суды тиімді бағыттап, көше жабындыларының бүлінуін болдырмау мақсатында қолға алынған маңызды шара.
Сонымен қатар, «Халық қатысатын бюджет» бағдарламасы аясында аудан тұрғындарының ұсыныстары негізінде бірнеше балалар ойын алаңы мен шағын саябақтардың құрылысы басталды. Бұл бағдарлама азаматтық белсенділікті арттырып, жергілікті мәселелерді бірлесе шешуге жағдай жасауда.
Аудан экономикасын дамыту бағытында өндірістік және логистикалық нысандардың үлесі де артуда. Қойма кешендері мен шағын кәсіпорындар инфрақұрылымды кеңейтіп, жаңа жұмыс орындарын ашу арқылы жергілікті халықтың әлеуметтік жағдайын жақсартуға үлес қосып келеді.
Жалпы, Абай ауданындағы инфрақұрылым саласындағы жүйелі жаңғырту жұмыстары – қала дамуының нақты көрсеткіші. Жолдардың тегістелуі, жарық шамдарының орнатылуы, әлеуметтік нысандардың көбеюі – мұның бәрі тұрғындардың өмір сүру деңгейін арттыруға бағытталған маңызды қадамдар.
Айта кетейік, инфрақұрылым жобаларының уақтылы әрі сапалы орындалуы аудан әкімдігі мен тиісті басқармалардың тұрақты бақылауында.
